Mâu hơnăm hdrối nah, tơrŭm cheăng pơla péa kong pơlê châ rak vế tơniăn ƀă 14 khu kăn lăm troh a tơnêi têa dêi rơpó; mâu tơdroăng pơkâ mơdêk ‘no liăn cheăng tê mơdró, tơdjêp khu mơdró kâ, trâm mâ ‘na khôi túa lĕm tro, ôm hyô ƀă trâm mâ kuăn pơlê châ tơbleăng pêi pro. Khu mơdró kâ Dak Lak pơtối ‘no liăn pêt, rak ngăn, kúa chhá kơxu a Mondulkiri, ƀă lối 1.623 ha kơxu hiăng vâ kúa.

Péa pâ tơrŭm pơkuâ ngăn, rak vế troăng tơkăng kong xŏn vâ chê 72km ƀă tí tăng, tơkŭm djâ vêh dêi ngi tơnêi têa kơxêng kiâ mố đô̆i hlâ. Pơla hơnăm 2026 – 2030, péa to kong pơlê kô mơdêk rơdêi tơrŭm cheăng pêi chiâk deăng krá tơniăn, rak ngăn kong, pêi pro hên sinh hok, hbrâ mơdât mâu ngế pro xôi tơkâ luâ tơkăng kong, mơjiâng pro ôm hyô, hnê hriâm, khăm pơlât ƀă tơrŭm pro nhŏng o ƀă mâu kong pơlê a tíu tơkăng kong.