Tiô tơdroăng tơkêa bro “Mơdêk xúa kŏng ngê̆ thong tin ƀă pơ’lêh kơxô̆ tung hnê hriâm ƀă hnê mơjiâng tuăn ngôa rơkê hơnăm 2022 - 2025, troăng hơlâ pêi pro troh hơnăm 2030 tung kong pơlê Dak Lak”. Hơnăm 2025, tâi tâng  mâu hngêi trung hnê hriâm tung kong pơlê mơjiâng ƀă xúa tơƀrê tơdroăng hriâm tơdrêng tiô troăng hyôh, xúa kŏng ngê̆ thong tin tung tơdroăng pơ’lêh nếo ƀă troăng hơlâ hnê hriâm ƀă séa ngăn tối mâu tơdroăng.

Tơdroăng hnê hriâm phôh thông châ tơbleăng hriâm tiô tơdroăng mơ’no tơdrêng troăng hyôh internet châ 5% a râ má môi, 10% a râ má péa. Pêi pro tơdroăng tơkêa kố, nôkố kơvâ ngăn hnê hriâm Dak Lak hiăng tăng ƀă xúa ai pơxúa mâu tơdroăng chêh ‘măn tung kơmăi ‘na hnê mầm non, hnê yăo yuk phôh thong ƀă hnê yăo yuk thường xuyên; Tơbleăng tơdjêp liên thông mâu tơdroăng chêh ‘măn tung kơmăi ‘na mâu tơdroăng nếo ai ki ê a tơdroăng chêh ‘măn tung kơmăi kơvâ cheăng; mơdêk xúa kŏng ngê̆ thong tin tung hngêi trung vâ pơ’lêh troăng hnê hriâm, tơ’noăng ƀă séa ngăn tối mâu tơdroăng hriâm tơnôm ăm mâu kăn ƀô̆ rak ngăn, thái cô, tơdroăng rah mơngế mot cheăng.