Pơla hơnăm 2017–2021, kong pơlê hiăng kơdroh tah lối 7.400 biên chế; pơla hơnăm 2022-2026 kơdroh tơ’nôm lối 6.000 biên chế.  Pêi pro tiô Tối mơgêi kơxô̆ 121 ƀă Pơkâ kơxô̆ 60, Dak Lak rah pro rế lĕm tah 1 tíu pêi cheăng dêi râ kong pơlê, 24 râ tơring, 184 râ cheăm ƀă hrĭng kơ koan, ƀơrô pêi cheăng.

Kơnôm ing mê, ki tơƀrê tơdroăng cheăng dêi kơ koan, cheăm kong pơlê châ mơnhông tơƀrê, kơxô̆ mơngế pro hlá mơ-éa châ pro klêi tro hâi khế pơkâ kơpêng 98%, tơdah xo pro hlá mơ-éa tơdrêng tiô troăng hyôh châ 75%. Hneăng hôp Đảng ƀô̆ rêm râ hneăng ki nếo   hiăng pêi klêi rĕng tâ 15 hâi. Tơbleăng a rôh hôp pôa Nguyễn Đình Trung, Kăn hnê ngăn Tỉnh ủy Dak Lak pơkâ thế tơkâ luâ tơdroăng ‘na ‘na xoăng râ, tơmeăm khoăng kơmăi kơmok, tơniăn mâu pơkâ cheăng kâ - rêh ối pơlê pơla, malối cho xăm kơtiê, thế pơ’lêh nhên tơdế hneăng, tâng ôh tá séa ngăn kô pơ’lêh kăn ƀô̆.