VOV4.Xơ Đăng - Vâ hbrâ ăm hneăng tơ’noăng ƀă rah xo hok tro mot lâm 10, Khu pơkuâ hnê hriâm – Hnê mơjiâng tuăn ngôa rơkê kong pơlê Dak Lak hiăng pơkâ mâu hngêi trung mơjiâng troăng rah xo hok tro vâ tơniăn tơdroăng tung hnê hriâm.

 Tung pơlê kong kơdrâm Ƀuôn Ma Thuột ai 14 Hngêi trung râ má pái phôh thông rah xo hok tro mot lâm 10. Tung mê mâu hngêi trung râ má pái phôh thông Chuyên Nguyễn Du, Phôh thong hdroâng kuăn ngo ai tíu kâ koi ối pơtê Nơ Trang Lơng tơkŭm po tơ’noăng rah xo hok tro mot hriâm; Hngêi trung râ má pái phôh thông Thực hành Cao Nguyên ối tung Đăi hok Tây Nguyên ƀă 4 hngêi trung kuăn pơlê mơ’no liăn pro (mê cho Phú Xuân; Victory; Hoàng Việt; Đông Du) rah xo hok tro tiô troăng ki krê.

Dak Lak: Rah xo hok tro lâm 10 thế tơdrăng, ôh tá tơdjâk pakong

Mâu hngêi trung ki tơnêi têa mơ’no liăn mơjiâng pro ối rah tiô hok ƀă a râ Trung hok cơ sở. Tiô tối hdrối tơdroăng rah xo hok tro mot lâm 10 a Dak Lak kô tơkŭm po a tung dế măng tĭng khế 6. Khu pơkuâ hnê hriâm – Hnê mơjiâng kong pơlê Dak Lak tối ăm ‘nâi: Xua pơreăng xông tâ tú ó COVID-19, hơnăm hriâm 2021 – 2022 ki hên chô phut mâu vâi o hok tro hriâm mơ’no tơdrêng tung um tiô troăng măng internet xua mê tơdroăng mơnhên tơdroăng hriâm dêi vâi o thế pơkâ apoăng tung tơdroăng séa ngăn tơdroăng hriâm.

A Sa Ly tơplôu ƀă tơbleăng