Vâ rĕng pro klêi 53 tơmeăm xúa, tơdroăng tơkêa bro ki kal, kong pơlê Dak Lak hiăng mơjiâng 5 Tôh pêi cheăng dêi Khu pơkuâ hnê ngăn Đảng, xua Kăn hnê ngăn ƀă mâu Kăn phŏ hnê ngăn Đảng kong pơlê pro Tôh trương. Kố cho mâu tơdroăng tơkêa bro ối ai hên hồ sơ, tơvâ tơvân 'na tơnêi tơníu, chêl thiăn liăn, pro tíu ối kuăn pơlê ối tung pơla ton hâi khế.

Klêi kơ'nâi 45 hâi măng tơbleăng tơdroăng tơplâ tơleăng lĕm tơnêi tơníu, 7 tơdroăng tơkêa bro hiăng pêi klêi 100% tơnêi tơníu; 15 tơdroăng tơkêa bro châ sap ing 90% tơngi klêng. Tơdroăng châ tơƀrê kố ai drêng mâu Tôh pêi cheăng tơdrêng lăm troh a pơlê cheăm, rơtế ƀă kong pơlê ƀă khu mơ'no liăn cheăng klâ xoăng rêm tơdroăng tơvâ tơvân, mơnhên nhên tơdroăng kal pêi pro ƀă hnoăng cheăng dêi rêm tíu cheăng. Tơdrêng amê, kơxop hlá mơ-éa pơkâ pêi châ chêh tối rêm hâi kum khu râ kăn pơkuâ kong pơlê teăm 'nâi mâu tơdroăng tơkêa bro ki mơni kô hrá vâ hnê mơhno pơkâ tơleăng.

Ing tơdroăng pêi pro, pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak tối tiah kố, mâu tơdroăng tơvâ tơvân dêi mâu tơdroăng tơkêa bro ki khât gá ối hên a tơdroăng tơkŭm pêi pro.

“Hên tơdroăng ki hdrối nah pin tối gá pá, tối gá tơvâ tơdroăng pơkâ, troăng hơlâ, la drêng kăn pơkuâ troh a tíu pêi cheăng ƀă rơtế ƀă mâu kơ koan ki ai tơdjâk troh, rêm ngế kăn ƀô̆ pêi cheăng tơleăng mơnhên tơrêm tơdroăng, mơnhên nhên hnoăng cheăng, nhên hâi khế pơkâ mê hên tơdroăng pơrá chiâng pêi pro”.

Tâng pơcháu xo tơnêi cho môi tung mâu tơdroăng ki kal vâ djâ tơdroăng tơkêa bro mot pêi cheăng, mê mơ'no liăn cheăng tơnêi têa dế cho tơdroăng ki pá kân ƀă Dak Lak tung mâu khế mơ'nui hơnăm. A rôh hôp tiah hmâ khế 8 pơla hdrối kố nah, kăn pơkuâ kong pơlê mơdoh hên chôu séa ngăn tơdroăng 'no liăn cheăng. Pơkâ 'no liăn cheăng tơnêi têa hơnăm 2026 dêi Dak Lak lối 11.294 rơtal liăn. Troh nôkố, kong pơlê hiăng xing xoăng nhên lối 9.918 rơtal liăn, châ vâ chê 88%. Ki rơhêng vâ tối, ối 1.375 rơtal liăn tá hâi ai tŭm liăn vâ pơcháu.

Tiô pôa Cao Đình Huy, Kăn pơkuâ Khu râng liăn kong pơlê Dak Lak khế 8 tiô tơdroăng athế ‘no iâ hlái 3.000 rơtal liăn la ki khât bu châ dâng 604 rơtal liăn. Vâ châ tiô pơkâ ‘no liăn tiô pơkâ sap ing khế 7 troh khế 9, krê khế 9 kong pơlê athế pêi châ dâng 5.154 rơtal. Khu râng liăn ngân hiăng pêi cheăng ƀă mâu khu ki ‘no liăn cheăng ai tơdjâk, pơkâ thế tơhrâ tơdroăng ki pro.

“Nôkố Khu rak liăn ngân kô hbru ăm cheăm bêng mung kơxô̆ liăn ƀă bu hbru ăm to mâu tơdroăng tơkêa bro hiăng ai hâi khế séa ngăn. Rêm măng tĭng ngin kô pơkâ thế mâu Khu ki pơkuâ ngăn ai pâ thế klâi mê ngin kô hbru ăm tơdrêng hlối ƀă mâu tơdroăng cheăng ki hiăng pro klêi. Tung tơdroăng cheăng ki pó ôh tá ‘no liăn mê ngin kô xo tơvêh vâ hbru ăm mâu tơdroăng tơkêa bro ki ê”.

Nôkố dâng 60% kơxô̆ liăn 'no mơjiâng tơmeăm khoăng tơnêi têa dêi Dak Lak tơkŭm a 4 Khu pơkuâ tơdroăng tơkêa bro, mê cho Khu pơkuâ tơdroăng tơkêa troăng prôk ƀă pêi chiâk deăng, Khu mơ'no liăn mơjiâng pro peăng mâ hâi lo, Khu Ƀuôn Ma Thuột ƀă Khu Tuy Hòa. Hlo tơdroăng pơkâ thế pro pơhlêh nhên tung 'no liăn cheăng tơnêi têa, tăng tơnêi ƀă mâu tơdroăng tơkêa bro ki kal, pôa Đỗ Hữu Huy, Kăn hnê ngăn Vi ƀan kong pơlê Dak Lak pơkâ thế tơbleăng nhên tơdroăng ki mơ'no liăn cheăng dêi tơrêm tơdroăng tơkêa bro, tơrêm tơdroăng cheăng; khŏm pơhlêh liăn ngân ing mâu tơdroăng tơkêa bro ki ôh tá ai ivá pêi pro chiâng mâu tơdroăng tơkêa bro ki ai tơdroăng kal vâ ƀă ai ivá pêi tơƀrê tâ.

Khu râ kăn pơkuâ kong pơlê xuân pơkâ thế mơdêk séa ngăn tơdroăng ki ai khât a tíu mơjiâng pro, mơnhên ivá cheăng dêi khu ki mơjiâng pro. Mâu khu ki mơjiâng pro ôh tá tơxâng pơkâ thế châ séa ngăn hơ'lêh, ví tơdroăng ki ivá cheăng mơjiâng pro ôh tá rơhéa chiâng tíu ki mơdât pro hrá ƀă mơ'no liăn.

“Ƀơrô cheăng thế tơbleăng ăm Kăn hnê ngăn Vi ƀan kong pơlê pơkâ tơdroăng cheăng ăm Kăn hnê ngăn Vi ƀan pơkuâ rêm khu mơ'no liăn cheăng ƀă pơkâ tơdroăng cheăng lăm séa ngăn, mơhnhôk rêm tơdroăng tơkêa bro. Lăm troh a tíu mơjiâng pro, ngăn ngăn cho khu mơjiâng pro vâi ai kơmăi kơmok há lơ ôh, vâi ai mơngế pêi cheăng há lơ ôh; djâ tâi tâng hlá mơ-éa chêh tơdroăng mơjiâng pro tíu mơjiâng pro lo vâ séa ngăn. Séa ngăn tơniăn khât sap ing hâi kố troh mơ'nui hơnăm mơ'no liăn châ to lâi. Tâng tung pơla tơvâ tơvân mê mơnhên nhên cho khu mơjiâng pro ôh tá tơniăn ivá cheăng, mê pơkâ thế ngế ki 'no liăn pro thế hơ'lêh nếo."

Ing tơdroăng pêi thâ xo pơcháu tơnêi troh mơdêk mơ'no liăn cheăng tơnêi têa, Dak Lak dế pơkâ xiâm a môi troăng pêi nếo: séa ngăn tơdroăng tơkêa bro, tơleăng mơnhên tơrêm tíu ƀă tơdjêp tơdroăng pêi ƀă hnoăng cheăng pêi nhên. Kố châ ngăn cho troăng hơlâ ki kal vâ pro pơ'lêh tung mâu khế mơ'nui hơnăm, mơdêk rĕng tơdroăng pêi pro mâu tơdroăng tơkêa bro, xúa châ tơƀrê kơxô̆ liăn ƀă rĕng djâ mâu tơdroăng tơkêa bro ki xiâm mot xúa, pêi cheăng châ tơƀrê.