Dak Lak nôkố ai lối 1.200 to rơchôa, mê ai 676 long hdoăng têa, 280 to rơchôa kâng têa, 244 tíu hrik têa ƀă 2 tíu kâng rơchôa. Hdrối vâ troh rơnó mêi têa lân lu, Vi ƀan kuăn pơlê kong pơlê pơkâ thế mâu tíu pêi cheăng, kong pơlê séa ngăn, tối ‘na mâu rơchôa, malối long hdoăng têa, rơchôa ki hiăng tơ‘nhiê lơ ki ôh tá tơniăn xếo vâ teăm châ ‘nâi, rơnêu pro  mâu tíu ki hiăng vâ tơ’nhiê.

Pakĭng mê, mâu cheăm bêng athế tăng ngăn troăng hơlâ mơ’no têa a long hdoăng têa, long hngêi kơmăi on tơhrik; tăng ngăn tơmeăm vâ tối tơbleăng hdrối, mâu tơdroăng tối ăm ‘nâi ƀă troăng ki djâ kuăn pơlê châ ối tíu ê drêng kong mêi kân, têa lân lu lơ xía vâ ‘na kuăn mơngế ƀă tơmeăm khoăng. Ƀă mâu long rơchôa ki kân, mâu khu râ xing xoăng thế pơtối gak ngăn, vâ ‘nâi kong mêi têa lu la lâi, kơlo têa tâk đik hlối hbrâ mơ’no têa, teăm tơbleăng hdrối.