Ki eăng bâ kal tơtrŏng vâ ‘nâi, mê cho pêi lo liăn tê tơmeăm khoăng ngi kong têa ê hiăng kêi đeăng ƀă hluâ pơcháu tung hơnăm, mơjiâng ivá ki kal ăm troăng prôk mơ’nui hơnăm. Tâi tâng pêi lo liăn tê tơmeăm ngi kong têa ê 9 khế tiô tối hdrối lối 2,3 rơtal  dollars, tâk lối 37% tâng pơchông ƀă roh kố hơnăm 2024 ƀă tơkâ hluâ pơkâ pêi plâ hơnăm.

Ôm hyô xuân tâk hên ƀă tâi tâng pêi lo châ lối 11 rơpâu 465 rơtal liăn, tâk 81%. Kơvâ tê mơdró pơtối tơtêk, tâi tâng kơlo liăn tê ‘ngré kế tơmeăm ƀă pêi lo liăn tơmeăm ki rôe xúa châ vâ chê 139 rơpâu rơtal liăn, tâk 14%. Vâ châ pơkâ tơtêk plâ hơnăm 8%, Vi ƀan kong pơlê mơnhên mơtêk cheăng kâ rêh ối pơlê pơla tơdjuôm lâp kong pơlê tung 3 khế mơ’nui hơnăm thế tâk lối 10%.

Pôa Tạ Anh Tuấn, Kăn hnê ngăn Vi ƀan kong pơlê Dak Lak pơkâ thế mâu khu râ, kơvâ cheăng ƀă kong pơlê thế tơkŭm hên, mơdêk rĕng tơdroăng mơ’no liăn cheăng tơnêi têa, ki rơhêng vâ tối cho mâu tơdroăng tơkêa bro ki xiâm; mơdêk há yă tơnêi vâ kêi đeăng pơkâ xo hnoăng liăn ngân; tơdrêng amê tah lôi pá puât ăm mâu tơdroăng tơkêa bro pa kong liăn ngân tơnêi têa; mơdêk pơhlêh pro hlá mơ-éa ƀă tơniăn tung kring vế.