Kong mêi kân sap ing kơmăng lơ 8/9 pro mâu kơpong tung kong pơlê Dak Lak ai têa lân lu rơdâ, pro tơdjâk troăng klông.Vi ƀan kong pơlê Dak Lak pơkâ mâu cheăm, bêng pêi pro troăng hbrâ ví kong mêi kân mâu hâi la ngiâ.Khu pơkuâ ‘na Chiâk deăng ƀă Kong prâi kong pơlê Dak Lak tối ăm ‘nâi troh 4 chôu kơxê hâi lơ 9/9, kong mêi kân plâ hâi pro lŭp ‘na mơngế, hngêi ối ƀă tơdroăng pêt mơjiâng tơmeăm. Laga, mâu troăng prôk ki 'nâ tro têa lân lu iâ. A cheăm Ia Lốp, kông kơxô̆ 9 dế lân lu dâng 50cm, têa pơtối tâk, pro ôh tá chiâng vâ prôk lăm a dêi pó. Khu kăn pơkuâ cheăm hiăng mơhnhôk khu ki pleăng hnoăng cheăng hnhâng kơxái, tối tơbleăng tơdroăng ki rơ-iô, ôh tá ăm kuăn pơlê prôk lăm. Mâu tíu ki 'nâ dêi cheăm Ea Drông, cheăm Ea Kar, cheăm Čuôr Dăng, kong pơlê Dak Lak xuân hlo têa lân lu iâ.

Lối 300 ngế hok tro a 2 to hngêi trung cheăm Čuôr Dăng châ ăm pơtê pơtân hriâm xua troăng prôk tro têa lân lu. Drêng ai kong mêi pro ôh tá tơniăn, kong pơlê Dak Lak pơtối pơkâ thế mâu cheăm bêng pơtối rak hbrâ rơnáu, đi đo séa ngăn tơdroăng tối tơbleăng, pơtâng tối 'na hyôh kong prâi, hbrâ séa ngăn mâu kơpong ki tơ'lêi tro têa lân lu, tơnêi tơhnah tơhnâp ƀă mâu tíu troăng prôk ki ôh tá tơniăn. Mâu pơlê, cheăm hbrâ rơnáu tơdroăng xĕn kuăn pơlê a mâu kơpong ki tơ'lêi tro tơnêi tơhnah tơhnâp troh tíu tơniăn.