Klêi kơ’nâi tơmot chiâng môi ƀă Phú Yên, kong pơlê Dak Lak nếo ai ƀăng deăng lối 18.000 km karê, pơ’leăng mâ mơngế lối 3,3 rơtuh ngế, mơjiâng chiâng tíu mơnhông tá kơpong kân rơdâ ƀă kơpong tơbăng peăng tơdế tơnêi têa. Peăng mâ hâi Luô chiâng pêt kơphế ƀă mâu tơmeăm ing chiâk deăng môi tiah tiu, sầu riêng, kơxu, mắc ca; peăng mâ Hâi Lo ai têa kơxĭ, kơno têa kơxĭ, ká xi xŏng, rơtế tơmeăm ‘na ôm hyô, cheăng kâ tê kơxĭ ƀă logistics.

Nôkố Dak Lak ai 7 tơdroăng tơkêa bro mơ’no liăn tơdrêng dêi kong têa Nhuk ƀă tâi tâng kơxô̆ liăn kĭ vâ chê 30 rơtuh dollars. Kong pơlê mơnhên tung la ngiâ kô tâk tá kơxô̆ ƀă ki dâi lĕm mâu tơdroăng tơkêa bro dêi kong têa Nhuk, kơjo mâu tơdroăng tơkêa bro ai kŏng ngê̆, mơjiâng ki kơnâ tâk ƀă ai tơdroăng tơdjêp ƀă khu tê mơdró, kuăn pơlê a kong pơlê. Kăn teăng mâ Việt Nam a kong têa Nhuk hiăng tŏng gum tơdjêp Khu râ kăn pêi cheăng Dak Lak ƀă Tơkŭm po pro rơdêi rĕng Tê mơdró kong têa Nhuk (JETRO) ƀă Tíu xiâm ASEAN – Nhuk vâ ti tăng tơdroăng tơrŭm cheăng, tơbleăng tơmeăm ki ai hlâu ƀă po rơdâ tơrŭm ƀă mâu khu tơrŭm kong têa Nhuk.