A hneăng hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, Hà Nội dế mot tung môi hneăng mơnhông nếo ƀă pơkâ thế kơtăng tâ. Xua mê, rêm tơdroăng pơkâ 'na kăn ƀô̆ pơrá tơdjâk troh ivá mơnhông dêi pơlê kong kân ƀă um méa dêi khu kăn pơkuâ a ngiâ kuăn pơlê.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa loi tơngah Khu pơkuâ hnê ngăn Đảng Pơlê kong kân Hà Nội kô pơtối rak vế mâu tơdroăng châ tơƀrê ki hiăng châ pêi pro vâ mơjiâng châ môi khu kăn ƀô̆ tơdâng tơ'mô hnoăng cheăng, khu kăn ƀô̆ ai hiâm mơno lĕm, tuăn ngôa rơkê, ai luât pơkâ, tơdrăng, ai ivá pêi cheăng, rak tơniăn khu kăn pơkuâ pêi cheăng tơdrăng, châ tơƀrê. Klêi mê kum Hà Nội pê klêi mâu tơdroăng ki pá luâ tâ, mâu tơdroăng ki kân, pro pơ'lêh tung rak vế tiô khôi túa lĕm tro rơpâu hơnăm, mơnhông tơxâng ƀă tíu cheăng Pơlê kong xiâm, tung mơjiâng ngiâ méa dêi pơlê kong kân, dêi Pơlê kong xiâm ƀă mơnhông tơƀrê tơdroăng rêh ối ăm kuăn pơlê.