100 toăng hngêi hôp tơdjuôm hlối cho hngêi ối vâ hbrâ ví têa kân lân lu châ tơbleăng pro a 27 to cheăm, bêng, tâi tâng kơxô̆ liăn mơ'no pro lối 170 rơtal liăn cho ing liăn ngân kong pơlê Dak Lak. Tơdroăng tơkêa bro kố pơxiâm pro hâi lơ 27/6/2026. Mâu hngêi ki kố châ mơjiâng pro 2 râ, ƀă 3 túa pro tiô ki lĕm tơtro kơpong, ƀăng tơnêi trêi cho 300m2 rêm toăng hngêi. Troh nôkố, tâi tâng mâu hngêi ki kố hiăng pro klêi ƀă dế pơcháu vâ xúa. Veăng ai mâ a leh hiăng pro klêi, pôa Đặng Kim Hùng, thôn Ân Niên, ăm ‘nâi, tơdroăng ki ai tơ’nôm hngêi hmuâ ối tung pơla kong mê têa kân gum kuăn pơlê hmiân tuăn tâ drêng ai kong mê khía mơhot.

“Ai mâu rơpŏng hngêi ki ‘nâ hngêi vâi krâ kuăn pơlê xơpá khât vâ ối. Kơnôm châ Tơnêi têa tŏng gum pro ăm hngêi hmuâ ối tung pơla kong mê têa kân môi tiah kố mê vâi krâ kuăn pơlê phiu ro khât”.

Vâ hngêi ki kố châ pro tro tíu pơkâ, tơ’lêi ăm kuăn pơlê lăm mot ối, hên rơpŏng hiăng mơhnŏng pleăng xêh tơnêi. Pôa Nguyễn Liêm, a thôn Hiệp Đồng, cheăm Hòa Xuân, hiăng pleăng dâng 450m2 tơnêi dêi rơpŏng vâ pro hngêi ối tơdjuôm hlối cho hngêi ki vâ hmuâ ối tung pơla kong mê têa kân, tối:

“Nôkố hngêi ki kố gá krá kâk, xŏn lối 1m tâng vâ pơchông ƀă kong mê têa kân pơla hdrối nah, mê vâi krâ nhŏng o phiu ro khât, tâng têa kân lân lu lơ ai khía mơhot mê lăm tơkŭm ối tâi akố. Tối tơdjuôm akố nôkố gá tơniăn khât”.

Pôa Nguyễn Thiên Văn, Phŏ Kăn hnê ngăn Vi ƀan kong pơlê Dak Lak vêh mơnhên, mâu tơmeăm khoăng ki nếo châ mơjiâng cho vâ gum ăm pơlê pơla, cho tíu ki vâ hmuâ ối tơniăn drêng kong prâi pro ôh tá tơniăn. Xua mê, mâu cheăm, bêng kal athế pơkuâ, mơjiâng pro, xúa châ tơƀrê; vêh mơnhên ngăn mâu tơdroăng ‘na on lơtrik, têa, hyôh phon vâ hbrâ rơnáu xúa drêng tro khía mơhot têa kân lân lu, tơdroăng xía vâ.

Pôa Nguyễn Thiên Văn pơkâ thế mâu tíu pêi cheăng, kơvâ cheăng ƀă mâu cheăm, bêng mơnhên túa pơkâ hneăng má 1 Tơdroăng tơkêa bro mơ'no liăn mơjiâng pro hngêi ối tơdjuôm hlối hbrâ ví têa kân lân lu a thôn, pơlê, kơphô̆. Ing mê, hriăn plĕng po rơdâ a mâu kơpong ki hmâ tro tơdjâk dêi kong mê khía mơhot, têa kân lân lu.

“Ki hdrối tâ cho kum ăm tơdroăng ki vâ xúa tung rêh ối pơlê pơla, mâu tơdroăng ki kal dêi thôn, pơlê, kơphô̆. Malối tung hnoăng cheăng hbrâ ví kong prâi pro ôh tá tơniăn mê rơtế ƀă mơjiâng túa pơkâ 4 tơdrêng, xua mê kong pơlê athế séa ngăn mâu tơdroăng ki ai hlâu, on tơhrik, hyôh phôn vâ hbrâ rơnáu pro tíu ki ăm kuăn pơlê hmuâ ối drêng ai pơkâ lơ drêng ai kong prâi pro ôh tá tơniăn”.