Hơnăm 2026, tơdroăng hbrâ ví ƀă kong prâi pro ôh tá tơniăn châ kong pơlê Dak Lak mơdêk tiô troăng hơlâ hbrâ rơnáu tâ, ƀă vâ chê 100 tíu ki séa ngăn têa kơxĭ, 11 tíu ki tối hdrối têa kân lân lu; 100% cheăm, bêng mơjiâng khu ki djâ troăng ahdrối hbrâ ví kong prâi pro ôh tá tơniăn ai lối 11.000 ngế. Ki khât gá xuân pơkâ thế mâu tơdroăng kal pơtối 'mâi rơnêu, tung mê ai tơdroăng tơrŭm, tối ăm dêi rơpó 'nâi mâu tơdroăng tung tơdroăng rak ngăn rơchôa long têa drêng ai kong mêi têa kân lân lu. Kố cho ƀai hriâm châ Dak Lak hbrâ rơnáu klêi kơ'nâi rôh têa kân lân lu khế a 11 hơnăm nah.

Tơpui a Rôh hôp, pôa Lương Nguyễn Minh Triết, kăn pơkuâ hnê ngăn cheăng Đảng kong pơlê Dak Lak pơkâ thế rak vế tơpui tơno đi đo ƀă kong pơlê Gia Lai 'na kong mêi, mâu hno long têa tơdrêng amê hnối tối pơtâng troh kuăn pơlê hdrối vâ mơ'no têa. Saping apoăng hơnăm troh nôkố, kong prâi pro ôh tá tơniăn a kong pơlê Dak Lak hiăng pro 2 ngế hlâ, 109 toăng hngêi tro tơ'nhiê, ơmeăm khoăng tro lŭp tiô riân dâng 2,8 rơtal liăn.