Xo vế túa ki rơkê tơtro ing rôh têa kân lân lu khế 11/2025, hơnăm kố, tơdroăng tăng tíu ối pơtân ăm kuăn pơlê ối a mâu kơpong klong, kơpong ki ôh tá tơniăn châ kong pơlê Dak Lak tơmâng khât. A mâu cheăm peăng mâ Hâi lo kong pơlê, 100 toăng hngêi ví têa lu tiô mâu pơkâ pêi pro, mơjiâng pro pơrá phá xuân châ pro ing mâu kơxô̆ liăn pơlê pơla veăng gum. A mâu tíu ki ôh tá ai hngêi ví têa lu, vâi krâ nhŏng o mơ'no dêi liăn vâ mơjiâng pro hơpăm trá vâ ối pơtân pro hngêi ví têa lu.

Phái, kế kâ ki kal ƀă têa ôu vâ hbrâ rơnáu tâng lơ ai khía mơhot têa kân lân lu xuân cho tơdroăng ki thế hbrâ rơnáu tơdrêng hlối a rơpŏng hngêi. Ing tơdroăng hlo ai khât hên ngế tung pơla têa lân lu ƀă klêi kơ'nâi têa kân lân lu ôh tá ai tŭm phái, kế kâ, têa ôu ƀă hmân ếo xâp, pơkhom vâ xúa tung rôh têa kân lân lu hơnăm nah, vâi krâ nhŏng o pơrá 'nâi tơdroăng ki ‘ló tro tung tơdroăng hbrâ rơnáu drêng troh rơnó mê têa lân lu hơnăm kố.

Peăng khu râ kăn pơkuâ kong pơlê ƀă mâu khu ki pơkuâ pêi hnoăng cheăng mê, tơdroăng hbrâ ví kong prâi pro ôh tá tơniăn hiăng châ hbrâ nhên. Sap ing hdrối rơnó mêi, Khu xiâm pơkuâ rak ngăn rơchôa hno têa ƀă Hbrâ ví kong prâi pro ôh tá tơniăn (Khu xiâm ngăn 'na chiâk deăng ƀă Hyôh kong prâi) tơrŭm ƀă Khu xiâm ngăn 'na chiâk deăng ƀă Hyôh kong prâi kong pơlê Dak Lak, Viện Dinh Dưỡng (Khu xiâm ngăn pơkeăng ƀă khăm pơlât) tơkŭm po lâm hnê hriâm "Mơdêk ivá pơlê pơla tung pêi pro tăng ngăn vâ ‘nâi ki rơ-iô xua kong prâi pro ƀă tơniăn ƀă thế tơniăn ‘na ai kâ trếo piê kơhiâm tơdrêng" a Dak Lak.

Ing mê, mâu ngế hriâm cho mâu ngế tung mâu khu ki tŏng xo mâu ngế hliăng tiâ, tôh gâk kring pơlê pơla mâu cheăm, bêng… châ tơmâng hnê mơhno pêi pro mâu tơmeăm ki vâ séa mơnhên ngăn tơdroăng ki tơ'lêi trâm xía vâ kong prâi pro ôh tá tơniăn ing pơlê pơla; 'nâi nhên mâu tơdroăng ki lâi kô tơ'lêi trâm xía vâ; pơkâ mơ'no mâu troăng hơlâ hbrâ rơnáu vâ ví,  hbrâ tơtro ƀă tơdroăng ki ai khât dêi pơlê pơla; hnê mơhno tơdroăng hbrâ rơnáu ƀă rak tơniăn ai kế kâ kơhiâm, malối cho vâi hdrêng ƀă mâu ngế hiăng krâ… Pôa Phương Văn Lành, Kăn pơkuâ hnê ngăn Đảng ủy cheăm Hòa Thịnh - môi tung mâu cheăm kơpong klêa xiâm têa lân lu peăng mâ hâi Lo kong pơlê Dak Lak, ăm 'nâi:

“Cheăm xuân hiăng tơrŭm ƀă Khu xiâm hbrâ ví xía vâ kong prâi pro ôh tá tơniăn tơkŭm po hnê hriâm vâ hlê plĕng, túa ki rơkê tơtro 'na hbrâ ví xía vâ kong prâi pro ôh tá tơniăn, hnê ăm vâi krâ nhŏng o hbrâ ví têa kân lân lu; tơdrêng amê hlối hbrâ rơnáu mâu plong tuk ƀă ếo chhá ăm mâu thôn vâ hbrâ rơnáu. Pakĭng mê, cheăm xuân hiăng tơdah xo mâu cano plong tuk ki kơmăi têi vâ xúa chơ tung tơdroăng hbrâ ví têa kân lân lu tung la ngiâ”.

Tiô pôa Đào Mỹ, Phŏ Kăn hnê ngăn Vi ƀan kong pơlê Dak Lak, nôkố kong pơlê dế tơkŭm séa ngăn, tăng ngăn vâ ‘nâi troăng hơlâ pêi pro ki lâi ‘ló túa pơkâ hbrâ ví kong prâi pro ôh tá tơniăn tung mâu khế mơ'nui hơnăm 2026. A mâu cheăm, tơmâng ‘mâi pêi pro tơdroăng "pŭn tơdrêng amê", mơdêk ivá pêi cheăng dêi râ cheăm; xing xoăng tơmeăm khoăng, rơxế, tơmeăm vâ pêi ƀă tơmeăm ki kal xúa rêm hâi a mâu kơpong ki tơ'lêi tro, tơniăn kô châ tŏng gum ƀă xúa tơdrêng hlối.

Tơdrêng amê, Vi ƀan hnê ngăn kong pơlê Dak Lak pơkâ hnê mơhno ăm mâu cheăm mơjiâng troăng hơlâ tơrŭm, tŏng kum tiô kơpong têa kroăng, pá xôp kroăng, pá xôp mâu long têa, kơpong kĭng têa kơxĭ ƀă mâu kơpong rơ-iô nhôm tơ’lêi tro têa lân lu. Khu ki hbrâ rơnáu tŏng gum lo ing kong pơlê troh a cheăm xuân tơkŭm hnê hriâm hbrâ rơnáu tŏng kum drêng  ai mâu tơdroăng  kal vâ kum tơdrêng.

“Nôkố ngin xuân dế pơtối 'mâi mơnhông Khu pơkuâ hnê mơhno Ƀơrô ngăn kuăn pơlê a cheăm vâ hmâ ƀă tơdroăng ki tơná hbrâ ví xêh ƀă mâu tơdroăng a cheăm pơlê”.