Tung mơhno túa lĕm tro dêi hdrông mơngế Rơđế, idrâp chêng ôh tá xê to idrâp dêi prôa. Mê cho idrâp krếo dêi pơlê pơla, cho idrâp ki ối tung mâu rôh ki kal dêi tơdroăng rêh ối, cheăng kâ. Ngế hdrêng kot mâ ai idrâp chêng hơniâp ro. Drêng vâi krâ vêh ƀă jâ pôa, idrâp chêng pơtối chuât xơtó.

Ngê̆ nhân Y Tŏ Ƀyă, ối khĕn cho pôa Sa, ối a ƀuôn Dang Kang, cheăm Dang Kang, kong pơlê Dak Lak tối ăm ngin 'nâi, idrâp chêng koăng ôh tá păng lôi tung tơdroăng rêh ối, cheăng kâ. La vâ khoh chiâng rơkê tôu, mâu ngế ki hriâm chêng athế pơxiâm ing mâu tơdrá ki tơ'lêi má môi, cho  chêng ki pro ƀă kơlá:

“Tiô khôi túa, tung mâu tơdroăng leh mơdĭng dêi pơlê pơla, idrâp chêng koăng đi đo rak môi túa ki phá krê xêh. Rêm hdroh pêi pro mâu tơdroăng rơkâu xối Xeăng, idrâp chêng koăng pơtối châ tôu pu hung pu hung. La ki apoăng, athế pơtâp ƀă chêng kơlá. Drêng hiăng rơkê tôu tơrêm rơ-rêk chêng, vâi pơtối hriâm ƀă tŏn ƀă chêng meăm hlái”.

Ing mâu idrâp chêng kơlá ki apoăng, mơngế ki hriâm rế hmâ ƀă tơrêm idrâp, tơrêm tơdrá, rơ-rêk. Vâ ing mê ah, drêng idrâp chêng koăng chuât xơtó tung mâu hâi leh mơdĭng, rêm idrâp chêng ôh tá xê to djâ pơtroh ki chuât, mê ối djâ troh mâu tơdroăng ki kơnía châ pơtroh ăm  hên rơxông. Nghệ nhân Y Ka Niê (pôa Cứu), ối a ƀuôn Dang Kang, cheăm Dang Kang, kong pơlê Dak Lak tối ăm ngin 'nâi:

“Nôkố á hiăng hên hơnăm, la á xuân ối mơ-eăm hnê tôu chêng ăm kuăn cháu tung pơlê. Troh nôkố, á hiăng hnê châ môi khu, mâu vâi muăn hiăng rơkê tôu mâu ƀai chêng ki á hnê. Á pói vâ kuăn cháu pơtối mơ-eăm mơhriâm ƀă rak vế idrâp chêng, vâ pôi tá hía lôi túa lĕm tro dêi hdroâng kuăn ngo tơná pin”.

Ƀă tơdroăng hnê kơhnâ khât dêi mâu vâi krâ, vâi ngê̆ nhân, tơdroăng a mâu rôh hriâm tôu chêng tung pơlê pơla đi đo hơniâp ro. Mê ôh tá xê to hriâm túa tôu môi tơdrá, môi ƀai chêng, mê ối cho tơdroăng ki vâ gum mơhno mâu vâi hdrêng hlê plĕng tâ 'na khôi túa lĕm tro dêi hdroâng kuăn ngo tơná. Ai ngế muăn ki 'nâ nếo 7 hơnăm hiăng pơxiâm hmâ ƀă chêng kơlá. Ing hngêi trá xŏn, idrâp, tơdrá chêng tiô mâu vâi muăn troh a hngêi trung hriâm, troh mâu roh trâm mâ, tơpui tơno dêi pơlê pơla. Ngoh Y Tloi Niê (pâ Tra), môi ngế kuăn pơlê ai tối:

“Tơdroăng rak vế, chôu 'măn ƀă pơtối hnê tôu  chêng tơgôu koăng pơxiâm ing tơdroăng ki rơhêng vâ, git khât dêi vâi krâ-nhŏng o tung pơlê. Ngin xuân ối hnê ăm mâu vâi kuăn 'nĕng, sap ing vâi hdrêng troh mâu vâi krâ ki hiăng hên hơnăm. Malối, mâu vâi krâ hnê ăm mâu vâi kuăn 'nĕng sap ing 7 troh 8 hơnăm, tơdrêng amê, hlối hbrâ hnê ăm mâu vâi o hok tro a hngêi trung râ má 2”.

“Mơngế hơnăm hiăng krâ, ivá pá hro kô ai mơngế hơnăm ối nếo vâ pơtó la ngiâ”, la drêng ai mâu tơdroăng ki hơ'lêh rĕng, hơ’lêh kân dêi pơlê pơla hên ngế hơnăm ối nếo xuân mot tơbriât tung tơdroăng ki lăm hơngế pêi cheăng kâ, tăng liăn ngân, mê ôh tá xê drêng lâi tung pơlê xuân chiâng vâ tơkŭm tŭm khu tôu chêng tơgôu koăng hơnăm ối nếo. Mê xuân cho tơdroăng ki tô tuăn dêi ngê̆ nhân Y Cheo Byă (pôa Bươm), ối a ƀuôn Dang Kang.

“Cho păng ‘nâng, khu ngê̆ nhân ngin hơnăm hiăng krâ, la xuân ối rơtế dêi pó pơtâp, mơhriâm. Ki kal tâ cho khu kăn hnê ngăn kal ai pơkâ troăng hơlâ hnê mơhno, hnê ‘măn, mê tơdroăng rak vế ƀă mơnhông idrâp chêng koăng kô châ cho khât. Kố ôh tá xê to tơdroăng cheăng dêi krê mâu ngê̆ nhân ngin, xua hơnăm ngin hiăng krâ, la ngiâ ah kô ôh tá ai tŭm ivá vâ tôu chêng koăng, vâ lăm mơđah xếo”.

Idrâp chêng Dang Kang hâi kố xuân ối hơniâp ro rêm rơnó leh mơdĭng. La klêi kơ'nâi rêm idrâp chêng ki hơniâp ro mê cho tơdroăng ki tô tuăn dêi mâu vâi krâ ki rơkê. Tơdroăng ki hâk vâ ƀă mơ-eăm dêi mâu ngê̆ nhân dế pơtối 'măn ăm tơdroăng ki hlê plĕng, ki 'nâi dêi tơmeăm khoăng chal krâ nah, dêi kong ngo ƀă rơxông hơnăm ối nếo. Vâ rêm rôh troh a kơxê kơmăng, tung kong kế, ngo ngối, vâi xuân ối tâng idrâp, rơ-rêk dêi chêng chuât xơtó trối tơdroăng ki ôh tá la lâi pơtê dêi pơlê pơla Dang Kang.