Pêi pro tơdroăng pơkâ kơxô̆ 08 hơnăm 2021 dêi Hô̆i đong kong pơlê Dak Lak 'na tŏng kum mơnhông ôm hyô pơlê pơla a mâu thôn, pơlê hdroâng kuăn ngo pơla hơnăm 2021-2025, tung 3 hơnăm hiăng hdrối nah, kong pơlê hiăng tŏng kum 5 to pơlê ƀă 22 rơpŏng, ƀă tâi tâng kơxô̆ liăn mơ'no vâ chê 4,2 rơtal liăn. Xiâm kối châ 'no liăn cheăng ăm tơmeăm khoăng, kong kế, kơƀăng tăng, hngêi mơdrah, tíu 'măn rơxế, ếo pơtâk ƀă tơmeăm mơđah tơbleăng.

Troăng hơlâ apoăng pro tơ'lêi hlâu vâ kuăn pơlê veăng tơrŭm tung tơdroăng ki ăm tơmối kâ koi ối pơtê, kơchâi kâ, mơđah tơbleăng khôi túa lĕm tro ƀă hnê mơhno ăm tơmối châ mơnúa ngăn. Laga, ki hên túa pơkâ ối kŭn; tơmeăm pơla mâu pơlê ối tơdâng tơ'mô, tơrŭm ƀă khu mơdró kâ ôh tá krá tơniăn. Kơxô̆ tơmối ƀă kơxô̆ liăn pêi lo tá hâi tơniăn, pro pá ăm tơdroăng ki 'mâi rơnêu ƀă rak vế tơdroăng cheăng klêi kơ'nâi mơgêi tŏng kum. Jâ H Zu ni Niê, Kăn pơkuâ hnê ngăn Chi ƀô̆ ƀuôn ôm hyô pơlê pơla Akŏ Dhông tối tiah kố, troăng hơlâ nếo kal rơtế prôk ton troh tá ah ƀă pơlê pơla.

“Tơdroăng pơkâ kơxô̆ 08 hơnăm 2021 dêi Hô̆i đong hnê ngăn kong pơlê cho tơdroăng ki kal vâ mơnhông ôm hyô pơlê pơla, sap ing mâu lâm hnê hriâm pro ôm hyô troh troăng hơlâ tŏng kum tơmeăm khoăng, cho ivá mơhnhôk kân vâ kuăn pơlê mơnhông mơjiâng pro xêh ôm hyô. Púi rơhêng vâ troăng hơlâ tŏng gum pơla hơnăm 2026-2030 kô pêi klêi tâ 'na troăng hơlâ, ôh tá xê tŏng kum môi hdroh mê kô pơtối pêi pro đi đo; ai mâu tơdroăng tŏng kum nhên tâ ƀă mâu kuăn pơlê ki ối rak hngêi trá, mâu ngê̆ nhân tŏn chêng tơgôu koăng lơ ngê̆ nhân teăn hmôu jiâ”.

A rôh hôp, mâu kăn Hô̆i đong kong pơlê Dak Lak xuân tối hên tơdroăng, pâ thế ‘na troăng hơlâ tŏng gum pơla 2026-2030 pơtroh sap ing tŏng gum mâu kế tơmeăm chiâng veăng gum rơtế prôk tung pơla mơjiâng pro kế tơmeăm, tơkŭm mơhnhôk ƀă châ tơrŭm tung kơchô mơdró. Tơdrêng amê hlối lêi tah mâu tơdroăng ki tơvâ tơvân ‘na tơnêi, kơxô̆ liăn mung ƀă kế tơmeăm tŏng gum ki ê, kal peie pro nhên hnoăng pơkuâ, ‘mêng rơnêu kế tơmeăm; mơdêk tơdroăng cheăng rơkê ƀă ivá tơrŭm cheăng vâ kuăn pơlê rơkê khât tung tơdroăng cheăng pro ôm hyô.

Mơgêi hneăng hôp, jâ Cao Thị Hòa An, Phŏ kăn pơkuâ hnê ngăn cheăng Đảng kong pơlê, Kăn hnê ngăn Hô̆i đong kong pơlê Dak Lak pơkâ thế Vi ƀan hnê ngăn kong pơlê rĕng hriăn plĕng troăng hơlâ ki nếo pơhlêh Pơkâ kơxô̆ 08 'na tŏng kum mơjiâng pro ôm hyô pơlê pơla a mâu thôn, pơlê hdroâng kuăn ngo.

“Á pâ thế Vi ƀan hnê ngăn kong pơlê athế hriăn plĕng, tí tăng 'nâi plĕng vâ pơkâ mơ'no troăng hơlâ ki nếo teăng ăm tơdroăng pơkâ ki ton. Mâu tơdroăng ki xơpá, tơvâ tơvân, ki ôh tá tro mê pin athế ai troăng hơlâ, túa cheăng ki vâ pêi pro tơtro tâ. Xo kuăn pơlê, khu mơdró kâ ƀă kuăn pơlê hdrông kuăn ngo cho ki xiâm vâ mơdêk tơdroăng ki tơrŭm pơla khu pêi cheăng tơrŭm 'na ôm hyô pơlê pơla ƀă khu mơdró kâ ki pơto chơ tơmối; hnê mơjiâng, hnê hriâm a tíu pêi cheăng 'na tơdroăng ki rơkê plĕng, nâl tơpui, kế kâ vâ tơná vâi krâ-nhŏng o pêi pro xêh tơdroăng ki tê mơdró kế tơmeăm”.