Nôu pâ hiăng hlâ lêk lôi ôh tá xê to tơdroăng ki châi heăng dêi tơná mâu vâi o mê ối cho tơdroăng ki sĭng hơ’nêng, pá puât dêi rơpŏng hngêi, ngoh nâ o tung hngêi. O Võ Thị Ngọc Ngân, hok tro Hngêi trung râ má pái phông thong Bà Điển, Pơlê kong kân Hồ Chí Minh, ai tối:

“Sap ing hâi pâ á hlâ, tơdroăng rêh ối tung rơpŏng trâm hên pá puih hên ó ‘nâng drêng tâi tâng tơdroăng cheăng kâ, liăn ngân pơrá tơpôu hngăm ăm ngế nôu. Maluâ tơdroăng cheăng pá puât pá kâi tối, xua pêi cheăng kâ, tăng liăn ngân ôh tá xê hlâu, nôu xuân ối khŏm mơ-eăm tâi ivá tơná vâ vâi nâ o ngin kuăn châ pơtối troh mơhriâm a hngêi trung môi tiah mâu vâi pú ki môi rơxông”.

Lâp tơnêi têa pin dế kố ai dâng 1 rơtuh 500 rơpâu ngế vâi hdrêng ai tơdroăng rêh ối xahpá, tung mê ai dâng 176 rơpâu ngế vâi hdrêng kuăn tê, vâi hdrêng tro mơhrâm lôi pá rŏng. Hên troăng hơlâ, tơdroăng pơkâ, hiăng châ tơbleăng pêi pro vâ rak tơniăn ăm vâi hdrêng kuăn tê, vâi hdrêng tro mơhrâm lôi châ mơnhông mơdêk rêh ối, ƀă ai tơdroăng rêh ối lĕm tro tâ môi tiah: Luât lâp plâi tơnêi 'na hnoăng gum rak vâi hdrêng, Luât ‘na vâi hdrêng, Tơdroăng pêi pro dêi tơnêi têa xua vâ gum vâi hdrêng pơla hơnăm 2021-2030; Troăng hơlâ luât pơkâ 'na vâi hdrêng ki ai tơdroăng rêh ối pá puât…

Nôkố lâp tơnêi têa dế pêi pro tơdroăng tŏng veăng kum rêh ối pơlê pơla rêm khế ăm 21.000 ngế vâi hdrêng kuăn tê. Pakĭng mê, Đảng ƀă Tơnêi têa hiăng pơkâ, mơ’no troăng hơlâ kơjo kum, mơhnhôk mâu khu tơrŭm cheăng, mâu ngế krê, khu mơdró kâ tung tơnêi têa ƀă kong têa ê rơtế tơdjuôm ivá, veăng tŏng kum, rak ngăn vâi hdrêng kuăn tê tối krê, vâi hdrêng ki ai tơdroăng rêh ối pá puât tối tơdjuôm.

Ing mâu tơdroăng ki mê hiăng tơveăng gum, rak ngăn tơdroăng rêh ối dêi vâi hdrêng kuăn tê, vâi hdrêng mơhrâm lôi, pro rôh tơ'lêi hlâu vâ mơnhông ki tơdâng tơ'mô, gum pêi pro tro tâ hnoăng ki pơxúa tơxâng, tơtro luât, mơhnhôk mâu vâi o loi tơngah, chân tuăn i hiâm vâ mơnhông ivá rêh ối, chân tung mơhriâm, mơnhông dêi tơná tơrŭm ƀă pơlê pơla. Pôa Nguyễn Văn Lực, Kăn hnê ngăn Khu tŏng kum mơngế chó chêng tơvê kŏng kong pơlê Lâm Đồng ai tối:

“A Lâm Đồng ai lối 4.000 ngế vâi hdrêng kuăn tê kal athế rak ngăn. Rêm khế ngin tŏng kum ăm 400 ngế vâi muăn, rêm ngế 1 rơtuh liăn, môi hơnăm tiah mê cho 4 rơtal 800 rơtuh liăn. Ƀă rêm apoăng hơnăm hriâm nếo, ngin tơkŭm po, tơdjâ mơhnhôk nhŏng o tung khu veăng tơlo, ôh tá êa pâ thế khu râ ki ê gum liăn, vâ tŏng kum ăm 20 ngế vâi hdrêng kuăn tê mot hriâm râ đăi hok ƀă rêm ngế vâi muăn châ tŏng kum 200 rơtuh liăn vâ tơniăn tung plâ 4 hơnăm hriâm. Ƀă pro ti lâi vâ mâu vâi muăn chân tuăn hiâm tung rêh ối, mơ-eăm mơnhông, ôh tá xê to châ tiah mâu vâi ki ê tung pơlê pơla mê la ngiâ kố hiá ah ối veăng ‘no dêi hnoăng kum ăm pơlê pơla”.

Pôa Ngô Sách Thực, Kăn hnê ngăn Khu tŏng kum mơngế chó chêng tơvê kŏng Việt Nam ăm 'nâi: ƀă tơdroăng ki tơveăng kum dêi mâu khu tơrŭm cheăng, khu mơdró kâ, khu ki ai hiâm mơno hơ-ui ƀă hên khu râ pơlê pơla, tung 5 hơnăm hdrối mê hía nah, mâu khu râ hiăng mơhnhôk châ lối 637 rơtal liăn vâ diâp hnoăng liăn hriâm rơkê, rơxế mái, kế tơmeăm xúa tung hriâm tâp… rak ngăn ăm vâi hdrêng ki ai tơdroăng rêh ối pá puât:

“Khu tŏng kum mơngế chó chêng tơvê kŏng Việt Nam đi đo tơmiât pro ti lâi vâ tơdroăng cheăng rak ngăn vâi hdrêng ôh tá xê to tŏng kum to 'na kế tơmeăm khoăng mê ối pro ivá ki rơdêi vâ mâu vâi o chân tuăn hiâm kâi pơtối hriâm tâp, pơtâp dêi hiâm mơno tơná kơdo mơ-eăm tung rêh ối, ôh tá lôi kơbố pá rŏng”.

Đảng, Tơnêi têa pin đi đo môi tuăn troăng hơlâ mơnhông mơdêk rak xo kuăn mơngế cho ki xiâm, cho mơngế ki kal má môi, cho hnoăng cheăng pơkâ ƀă ivá ki xiâm dêi tơdroăng vâ mơnhông mơdêk. Xua ti mê, rak ngăn, păn roăng, hnê mơhriâm ăm vâi hdrêng kuăn tê, vâi hdrêng tro mơhrâm ƀă mâu ngế ai tơdroăng rêh ối pá puât rế cho hnoăng cheăng dêi Tơnêi têa, rế cho tơdroăng cheăng pêi pro ki kal kân má môi dêi tâi tâng pơlê pơla. Kố xuân cho khôi túa lĕm tro sap ing nah dêi hdroâng mơngế, rak ngăn, kring vế ƀă pro tơ'lêi hlâu vâ vâi hdrêng kuăn tê châ mơhriâm tâp, mơnhông mơdêk tŭm têk rêh kâ ối, mơhriâm tâp, krá tơniăn chiâng mơngế ki ai pơxúa ăm pơlê pơla.