Kơxô̆ liăn pleăng veăng gum mê kô veăng 'mâi rơnêu hngêi tuăn pâ, 'mâi xĕn tâp kơxêng kiâ mố đô̆i, diâp kơxuô tơmeăm ăm mâu Jâ Nôu Việt Nam khên tơnôu, nhŏng o rơpŏng hngêi mố đô̆i hlâ tung rôh tơplâ xâ, tŏng kum séa ngăn mơnhên ADN mâu ngế.

Tâi tâng kơxô̆ liăn pơrá châ pơkuâ rak ‘măn pêi tơdroăng ki ‘ló tro, nhên, xúa tro tơdroăng. Tiô tối hdrối sap nôkố troh Têt Lo hơnăm nếo Đinh Mùi (2027), Khu tŏng kum rơpŏng mô đô̆i hlâ ai hnoăng dêi Việt Nam kô mơ'no dâng 9 rơtal liăn ăm  pêi mâu tơdroăng cheăng mê cho: 'Mâi rơnêu hngêi tuăn pâ, tŏng kum pơtroh kơxêng kiâ mô đô̆i, séa ngăn ADN ƀă lăm pôu, hbru tơmeăm ăm mâu rơpŏng ai hnoăng tơnêi têa, nhŏng o mô đô̆i hlâ tung tơplâ xâ, Jâ Nôu Việt Nam khên tơnôu. Kơxô̆ liăn ki u ối pơtối châ hbrâ ăm mâu tơdroăng cheăng tơbâ 80 hơnăm Hâi mô đô̆i rong râ hlâ hía a hơnăm 2027.