Rôh tơnêi tơhnah tơhnâp kân a ngo Cấm, kong pơlê Bình Định ton a khế 11/2021 hiăng tâp kơđu lối 40 toăng hngêi, tơdjâk troh tơdroăng rêh ối dêi lối hrĭng ngế kuăn pơlê. Troh nôkố, lối 40 rơpŏng kuăn pơlê dế mơjiâng pro hngêi nếo a kơpong pro pơlê nếo, chôa 'lâng tơniăn tơdroăng rêh ối hdrối rơnó mê khía mơhot têa lân lu.

Mâu hâi tơdế khế 9, a Kơpong pro pơlê nếo kơpong kong prâi pro ôh tá tơniăn cheăm Cát Tiến, kong pơlê Gia Lai, lối 40 rơpŏng kuăn pơlê dế kơhnâ mơjiâng pro hngêi nếo. Kơpong pro pơlê nếo ối kơtăn tíu ối ton to lâi hrĭng met, ai tơnêi tơníu tơbăng lĕm, hngêi trăng on tơhrik, têa ƀă troăng prôk châ mơ'no liăn cheăng tơdâng tơ'mô. Cho môi tung mâu rơpŏng ki rĕng pro klêi hngêi, pôa Bùi Thanh Vương hiăng hơ'lêh troh tíu ối bu nếo châ môi khế.

“Tơnêi têa tơmâng ngăn tŏng gum vâ kuăn pơlê lo lăm ối a kơpong pro pơlê nếo mê phiu ro khât. Rơnó mêi hiăng troh mê kuăn pơlê phiu ro tơkôm mâu ngế cheăng pro hngêi rĕng pro klêi hngêi ối vâ ví hmuâ tơnêi tơhnah tơhnâp, akố kong mêi mê xâu ó khât. Nôkố akố mâu ngế pro on tơhrik, ngế pro têa krúa vêh hên a kố phiu ro pêi cheăng. Krê akố á ai 2 to hlá mơ-éa khêi, châ xo 2 lô tơnêi nếo”.

Rơtế ƀă rơpŏng pôa Vương, hên rơpŏng kuăn pơlê ki ê a thôn Trung Lương, cheăm Cát Tiến xuân hbrâ rơnáu mơjiâng pro hngêi drêng châ pơcháu tơnêi, ƀă tơdroăng ki rơhêng vâ rĕng lo ing kơpong ki tơ'lêi tro tơnêi tơhnâp. Pôa Mai Trần Hải, kuăn pơlê thôn Trung Lương, ăm 'nâi hdrối nah, rêm rôh kong mêi khía, rơpŏng pôa athế hơ'lêh lăm ối a tíu ki tơniăn. Nôkố ai tơnêi ối ƀă liăn tŏng kum, rơpŏng hiăng mung mơngế mơjiâng pro hngêi nếo.

“Hmốu ki kân tơhnah tâp kơđdu hngêi kuăn pơlê, tâi tâng kơpong ki mê athế ‘mâi xĕn tâi kuăn pơlê, ôh tá ăm kơbố ối amê xếo”.

Tơdroăng ki tô tuăn mê pơxiâm ing rôh tơnêi tơhnâp ó a ngo Cấm a khế 11/2021, tâp kơđu lối 40 toăng hngêi a thôn Trung Lương, kong pơlê Bình Định ton nah drêng mê hiăng tơbleăng tơdrêng tơdroăng 'na kong prâi pro ôh tá tơniăn a kơpong kố. Cheăm mơjiâng troăng hơlâ xĕn ối ăm 64 rơpŏng kuăn pơlê tung kơpong rơ-iô. Pôa Lại Minh Đức, Kăn pơkuâ thôn Trung Lương, ăm 'nâi, troh nôkố, 44 rơpŏng hiăng ƀă dế mơjiâng pro hngêi ối nếo.

“Kơpong pro pơlê nếo nôkố vâi krâ nhŏng o hiăng troh ƀă ối châ dâng 80% hiăng xo liăn troh tíu ối nếo vâ mơdâng ƀă mơjiâng pro hngêi. ối 20 rơpŏng kuăn pơlê xuân dế pơtối mơhnhôk vâ troh tíu ối nếo”.

Pôa Nguyễn Ngọc Thạch, phŏ pơkuâ Ƀơrô cheăng kâ cheăm Cát Tiến, ăm 'nâi cheăm dế pơtối mơdêk rĕng tơdroăng chêl thiăn liăn, xĕn kuăn pơlê; tơdrêng amê mơjiâng túa pơkâ rak tơniăn ăm mâu rơpŏng ki tá hâi châ xĕn troh tíu ối nếo.

“Tung la ngiâ mơ-eăm mơdêk rĕng tơdroăng ki ‘mâi xĕn kuăn pơlê vâ kuăn pơlê tơniăn tung tơdroăng rêh ối tung la ngiâ, Vi ƀan cheăm xuân hiăng mơjiâng túa pơkâ ‘mâi xĕn kuăn pơlê, pakĭng mê hiăng mơjiâng túa pơkâ hbrâ ví kong prâi pro ôh tá tơniăn hơnăm 2026. Ôh tá xê to ngo Cấm, mê cheăm hiăng mơjiâng túa pơkâ nhên tâng ai kong prâi pro ôh tá tơniăn kong pơlê kô mơ-eăm ‘mâi xĕn kuăn pơlê troh ối a mâu tíu tơniăn môi tiah mâu hngêi trung, tíu ki a ‘ngêi ôh tá tro têa lân”.

Ing kơpong tơnêi ki hmâ trâm tơdroăng ki tơhnah tơhnâp tơnêi, kuăn pơlê a chêng ngo Cấm dế chôa 'lâng hơ'lêh troh tíu ối tơniăn lĕm tâ. Mâu toăng hngêi nếo ôh tá xê to kum kuăn pơlê tơniăn tung rêh ối, mê ối cho tơdroăng châ tơƀrê dêi tơdroăng ki hbrâ ‘mâi xĕn kuăn pơlê lo ing kơpong ki tơ'lêi tro tơhnah tơhnâp. Maluâ ti mê, drêng rơnó mêi khía mơhot hiăng vâ chê troh, tơdroăng ki pro klêi xĕn mâu rơpŏng ki u ối cho hnoăng cheăng ki kal, vâ kơdroh iâ tơdroăng ki tro hía kế tơmeăm, xía vâ ‘na mơngế xua tơnêi tơhnah tơhnâp, rak tơniăn ăm châ chăn ƀă kế tơmeăm dêi kuăn pơlê.