A klâng báu Soi, thôn Nam Phước, cheăm Nghĩa Giang, kong pơlê Quảng Ngãi mâu klâng dế mot rơnó pôe báu tro têa lân lu. Ai tíu, bu u ối kơpâu báu lo a ngâ rơgâ têa; ai tíu, lâp klâng báu tơđôu a ‘nâi. Kuăn pơlê thế chu a klâng pôe rêm kât, ‘măn pêng plông priât chơ djâ a kĭng. Rơpŏng jâ Lê Thị Kiều, ối a thôn Mỹ Tịnh, cheăm Nghĩa Giang ai 4 sao klâng, 1 sao tro lân trâu hên hâi. Jâ Kiều thế kơnôm khu lêng kuăn pơlê cheăm tŏng gum pôe báu:

‘’Têa mơhiu djâ hrái lân tâi tâng báu, rơpŏng á tah hrái lân kơpêng báu. Nôkố têa xiâ ƀă châ cheăm tŏng gum xua mê nếo pôe. Mê sap kơxo má troh nôkố cheăm tŏng gum tơdrốu ngế chu pôe báu. Ƀă to lâi ngế kuăn kơnốu chu pôe báu. Tâng ôh tá ai tŏng gum mê mơni xuân lôi tê, mê ôh tá kâi vâ pôe’’.

Hên kơpong klâng lân trâu, báu tro tâm hên hâi hiăng pơxiâm lo hbú. Vâi krâ kuăn pơlê hbrâ rêm chôu têa xiâ vâ pôe báu. A ƀăng klâng, rơkong krếo dêi pó, idrâp chuât chăng liêm pôe báu rơtế idrâp kơmăi pôe, pro chiâng tíu ki kơdrâm sôk ro.

Mâu hâi hiăng hluâ, nâ Nguyễn Thị Thu Hiền, Kăn pơkuâ Khu pêi cheăng Mât trâ̆n thôn An Hội Bắc 2, cheăm Nghĩa Giang, rơtế ƀă khu tung thôn tŏng gum kuăn pơlê thôn Nam Phước pôe báu.

‘’Mâu nâ chu a klâng pôe, klêi mê lêng kuăn pơlê kô xui báu djâ a kĭng. Hâi hnah, to lâi ƀăng klâng peăng tá têa lân lu trâu, báu hiăng lo hbú tâi tâng. Ƀă ƀăng kơxo kố dế pôe xuân tro têa lân lu. Kơxê hnah, ƀăng klâng kố têa trâu, ôh tá chiâng vâ chu pôe. Mơhúa ôh tá mêi xếo xua mê kơxo kố têa xiâ. Rơpŏng xuân pôe, châ to lâi mê xo to mê’’.

A cheăm Nghĩa Giang ai 19 ha báu tro têa lân. Vi ƀan cheăm mơhnhôk khu lêng kuăn pơlê gâk ngăn, mâu chi hô̆i vâi kơdrâi ƀă khu lêng kuăn pơlê a mâu thôn chu a klâng tŏng gum kuăn pơlê. Pôa Cao Thanh Tuyên, Phŏ Kăn hnê ngăn Vi ƀan cheăm Nghĩa Giang, kong pơlê Quảng Ngãi tối ăm ‘nâi:

‘’A ngiâ, cheăm mơhnhôk mâu ngế lăm pôe, rak tơniăn tơtro ƀă kong prâi. Má péa nếo cho cheăm tơrŭm ƀă mâu kơ koan ki tơdjâk, tiô tối hdrối kô pơhlêh hâi pêt mâu rơnó vâ ví drêng ai kong mêi rĕng môi tiah nôkố. Pơtih, hơnăm kơ’nâi ngin kô pơhlêh hâi xế báu, pơhlêh hâi mơ’no têa ăm kuăn pơlê rĕng tâ drêng kố dâng 10 hâi. Tâng hâi ki pêt rĕng tâ dâng môi măng tĭng mê troh nôkố hiăng châ pôe tâi tâng’’.

Mâu hâi hiăng hluâ, hên kơpong tung kong pơlê Quảng Ngãi ai kong mêi kân troh kân ó, pro lối 63 hectar báu ƀă kơchâi drêh tro tơdjâk. Tung mê, lối 48 hectar báu a mâu cheăm An Phú, Nghĩa Giang ƀă Đình Cương tro têa lu. Pakĭng mê, dâng 15 hectar kơchâi drêh a cheăm An Phú tro tơ'nhiê xua kong mêi kân. Khu kăn pơkuâ ƀă mâu khu râ dế tŏng kum kuăn pơlê pôe xo vâ kơdroh ki tro lŭp.