A Hneăng hôp, pôa Nguyễn Thanh Bình, Kăn xiâm hnê ngăn Khu pơkuâ mơngế hơnăm hiăng krâ Việt Nam tối nhên, sap ing tơdroăng hmâ pêi pro "hơ-ui kơ mâu hơnăm hiăng krâ, nhuô̆m mâu hơnăm hiăng krâ", túa tơlá "pâ mơnê mâu ngế ki ai hnoăng" troh hiâm mơno "rế hơnăm hiăng krâ, tuăn mơno rế kơhnâ", mâu hơnăm hiăng krâ Việt Nam đi đo mơdêk hiâm mơno kăch măng, hiâm mơno pâ nhuô̆m tơnêi têa, hiâm mơno pôu râng hnoăng cheăng ƀă tơdroăng pói vâ pleăng hnoăng cheăng; veăng 'no hnoăng rơkê plĕng, tơdroăng ki rơkê, loi tơngah ƀă hiâm mơno tung tơdroăng mơjiâng ƀă kring vế Tơnêi têa.

Hvái ngăn hneăng hdrối, rêm râ Khu ngăn mơngế hơnăm hiăng krâ hiăng hơ'lêh nếo tơdroăng cheăng, túa pêi cheăng, tơmiât rơdêi troh a pơlê cheăm ƀă châ tơƀrê hên tung mâu kơvâ cheăng. Hnoăng cheăng mơjiâng khu pơtối châ tơmâng; tơdroăng cheăng rak ngăn, rak vế ƀă mơnhông hnoăng mơngế hơnăm hiăng krâ ai hên pơ'lêh tơƀrê.

Hên tơdroăng pêi pro ai pơxúa châ rak vế, po rơdâ môi tiah kâu lăk ƀô̆ rêm rơxông tŏng kum dêi rơpó; mâu kâu lăk ƀô̆ mơhno túa lĕm tro, hơdruê xuâng, pơtâp ivá, rak ngăn ivá, rak vế kong prâi ƀă tŏng kum cheăng kâ. Tơdroăng "Hơnăm hiăng krâ – Hâk tơngăm" pơtối po rơdâ, ƀă lối rơtuh ngế hơnăm hiăng krâ veăng mơjiâng Đảng, mơjiâng khu cheăng kal kí, tơleăng a pơlê cheăm, mơhnhôk hriâm, mơhnhôk 'na liăn ngân, rak tơniăn gâk kring, mơjiâng thôn pơlê nếo, kơphô̆ rơkê plĕng.

Hên ngế hơnăm hiăng krâ kơhnâ pêi cheăng, pêi chiâk deăng, tê mơdró; hlo ai mâu ngế ki djâ troăng ahdrối pêi cheăng kâ rơkê, mơnhông pêi chiâk deăng hưh cơ, cheăng kâ tiô troăng rơhlâ. Mâu tơdroăng veăng kum dêi mâu ngế hơnăm hiăng krâ tung rơpŏng hngêi ƀă pơlê pơla rế hía rế châ mơnhên.

Tung pơla tơnêi têa mot tung hneăng mơnhông mơdêk nếo ƀă tơdroăng ki krâ kơxô̆ pơ'leăng mâ mơngế rĕng, Kăn xiâm hnê ngăn Khu mơngế hơnăm hiăng krâ Việt Nam tối rơdêi, môi tung mâu tơdroăng xiâm kal pêi pro cho mơnhông mơdêk "cheăng kâ krâ kơxô̆", rơtế ƀă tơdroăng ki rơhêng vâ rế hên dêi mơngế hơnăm hiăng krâ 'na khăm pơlât, rak ngăn ton hơnăm, hngêi ối, túa lĕm tro, ôm hyô, hnê hriâm, kŏng ngê̆ ƀă mâu tơdroăng ki tơtro; pơ'lêh rơdêi ing tuăn tơmiât "rak ngăn" chiâng rế rak ngăn, rế mơnhông hnoăng cheăng dêi mơngế hơnăm hiăng krâ:

“Mê athế cho môi troăng hơlâ ki kal tung troăng hơlâ tơnêi têa vâ hmâ ƀă tơdroăng ki rế hía rế krâ dêi kuăn pơlê; pro tơ'lêi hlâu ƀă pro tơ'lêi hlâu vâ mâu ngế hơnăm hiăng krâ pơtối châ veăng kum ƀă mơnhông mơdêk. Rơtế amê, kal mơjiâng khu kăn ƀô̆ Khu athế khên tơnôu, rơkê plĕng, khên tơnôu veăng kum, pôu râng hnoăng cheăng, ai tuăn ngôa rơkê, ai ivá cheăng; mơdêk hơ'lêh kơxô̆, hơ'lêh ngiât lĕm; thăm tơrŭm ƀă mâu khu râ, kơvâ cheăng vâ pêi pro lĕm tro tâ hnoăng cheăng kring vế, rak ngăn ƀă mơnhông mơdêk hnoăng cheăng dêi mâu ngế hơnăm hiăng krâ tung tơdroăng nếo”.

Hlo pơkâ thế hmâ ƀă tơdroăng ki rĕng krâ dêi kuăn pơlê jâ Bùi Thị Minh Hoài, Kăn xiâm hnê ngăn Măt trâ̆n tơnêi têa Việt Nam tối nhên kal pơhlêh nếo túa tơmiât 'na tơdroăng cheăng ƀă mơngế hơnăm hiăng krâ, pơhlêh ing ngăn mơngế hơnăm hiăng krâ cho ngế ki châ xúa troăng hơlâ tŏng kum chiâng ngế ki veăng mơnhông mơdêk, pro tơ'lêi hlâu vâ mơngế hơnăm hiăng krâ pơtối rêh ối hơniâp ro, rêh ối mo lĕm, rêh ối ai pơxúa ƀă veăng kum tơtro ƀă ivá, ivá cheăng, tơdroăng ki rơkê plĕng, tơdroăng púi vâ dêi tơná.

Jâ Bùi Thị Minh Hoài, Kăn hnê ngăn Vi ƀan xiâm Măt trâ̆n Tơnêi têa Việt Nam pơkâ thế rêm râ Đảng, khu kăn pơkuâ, Măt trâ̆n Tơnêi têa, mâu khu tơrŭm cheăng ƀă Khu pơkuâ ngăn mâu ngế hơnăm hiăng krâ pơtối pê klêi troăng hơlâ, pơ'lêh nếo tơdroăng cheăng, túa pêi cheăng; tơmâng mâu ngế hơnăm hiăng krâ ai tơdroăng rêh ối pá puât, ngế ki ối xêh môi ngế, ngế ki ối a kơpong hơngế, hơngo, kơpong hdroâng kuăn ngo; tơdrêng amê pro tơ'lêi hlâu vâ mâu ngế hơnăm hiăng krâ veăng hnê tối mơjiâng Đảng, mơjiâng khu kăn pơkuâ, hnê hriâm khôi túa lĕm, tơleăng a pơlê pơla, rak tơniăn gâk kring ƀă mơjiâng tơdroăng rêh ối mơhno túa lĕm tro. Tơdrêng amê tối loi tơngah mâu rơxông hơnăm hiăng krâ Việt Nam pơtối mơdêk hiâm mơno "Hơnăm hiăng krâ - Tơdroăng ki lĕm", rơtế ƀă tâi tâng Đảng, tâi tâng kuăn pơlê, tâi tâng khu lêng pêi pro tơdroăng púi vâ mơnhông tơnêi têa kro mơdrŏng, rơkê, hơniâp lĕm. Jâ Bùi Thị Minh Hoài, Kăn xiâm hnê ngăn Măt trâ̆n Tơnêi têa Việt Nam tối nhên:

“Pêi pro tro tơdroăng kring vế, rak ngăn ƀă mơnhông hnoăng dêi mơngế hơnăm hiăng krâ; rak ngăn, tŏng kum mơngế hơnăm hiăng krâ ai tơdroăng rêh ối pá puât, ôh tá ăm mơngế hơnăm hiăng krâ ôh tá ai tơdroăng ki rak ngăn; mơhnhôk mơngế hơnăm hiăng krâ mơnhông tuăn ngôa rơkê, túa pêi cheăng, veăng mơnhông cheăng kâ a kong pơlê ƀă tơnêi têa, mơjiâng khu tơrŭm môi tuăn tâi tâng hdroâng mơngế; pro kông tơdjêp krá tơniăn pơla Đảng, Tơnêi têa ƀă mơngế hơnăm hiăng krâ. Khu râ kăn pơkuâ hnê ngăn cheăng Đảng, khu râ kăn pơkuâ rêm râ kal pro tơ'lêi hlâu vâ mơngế hơnăm hiăng krâ pơtối veăng hnê tối mơjiâng Đảng, mơjiâng khu râ kăn pơkuâ, rak vế tơniăn pơlê pơla, mơjiâng tơdroăng rêh ối mơhno túa lĕm tro ƀă mơjiâng khu tơrŭm tâi tâng hdroâng mơngế”.