Tơdroăng châ tơkŭm po a Hngêi trung Phôh thong ai tíu kâ koi ối pơtê Râ má môi ƀă Râ má péa Ia Lốp. Tung idrâp chuât dêi hơkâ, mâu vâi o châ mơđah hơdruê xoăng, tơchok, veăng tung mâu tơdroăng xah ro ƀă rơtế dêi rơpó tơbriât kơƀeăng ‘măn tơmeăm Trung thu. Rôh apoăng châ tơdah Trung thu tung hngêi trung nếo, o Triệu Thị Lan Anh, hok tro lâm 7, Hngêi trung Phôh thong ai tíu kâ koi ối pơtê Râ má môi ƀă Râ má péa hak ro tối:

“Hâi kố, á châ xah hêi trung thu ro khât, kuăn châ hriâm tung hngêi trung ki nếo, kuăn hlo ro khât, mâu vâi pú dêi á xuân ro ƀă hâk vâ. Á pâ mơnê troh mâu vâi tăm mố đô̆i, mâu vâi tăm ki ối hơngế  ing dêi hngêi ƀă mâu vâi pú ki tŏng kum, mâu vâi ngoh nâ đoàn viên. Á tơhrâ kô rak vế, hriâm tâp kơhnâ khât tâ nếo”.

Ia Lốp cho cheăm tơkăng kong, tơdroăng rêh ối dêi hên rơpŏng hok tro ối xơpá. Hơnăm hriâm kố, thái ƀă hok tro Hngêi trung phôh thong ai tíu kâ koi ối pơtê râ má môi ƀă râ má péa Ia Lốp ai tơ'nôm tơdroăng hơniâp ro drêng hngêi trung nếo châ 'no liăn mơjiâng pro, xúa. Thái Phạm Duy Tĩnh, Ngế pơkuâ hngêi trung ăm 'nâi, rôh trung thu hơnăm kố 862 ngế hok tro dêi hngêi trung pơrá châ tơdah kơxuô tơmeăm ƀă tơdah "kơmăng kơdrâm phiu ro" hơniâp ro, hơtô.

“Kố cho môi tơdroăng ki phiu ro khât, ôh tá xê to ƀă mâu thái cô mê ƀă tâi tâng mâu vâi o hok tro xuân môi tiah rơpŏng hngêi mâu vâi hok tro akố. Hâi kố xuân châ tơkŭm po tơdroăng trung thung kố mê cho tơdroăng ki ai pơxúa khât. 20 hơnăm kố, kố cho rôh tơkŭm po ki kân má môi ƀă xuân cho rôh apoăng dêi hngêi trung cheăm Ia Lốp”.

A rôh po tơdroăng, Khu tơkŭm po hiăng diâp 10 túa cheăng kâ, 10 toăng rơxế mái, 10 hnoăng liăn hriâm rơkê ƀă 890 kơxuô tơmeăm diâp ăm kuăn pơlê ƀă hok tro cheăm Ia Lốp; hlối diâp kơthô kheăn kơdeăn mâu vâi o ki kơhnâ rơkê tung tơdroăng "Kum o troh hngêi trung".

Krê dêi pôa Lương Nguyễn Minh Triết, kăn pơkuâ hnê ngăn Đảng kong pơlê Dak Lak hiăng diâp 10 hnoăng liăn hriâm rơkê ăm hok tro tơkâ hluâ pá puât ƀă 100 rơtuh liăn tŏng kum mơjiâng pro hngêi ối ăm môi rơpŏng kuăn pơlê hdroâng kuăn ngo ai tơdroăng rêh ối xơpá.

Đăi tă Đỗ Quang Thấm, kăn pơkuâ Đảng lêng Khu pơkuâ ngăn mố đô̆i gâk tơkăng kong dêi kong pơlê Dak Lak tối rơdêi, kố cho tơdroăng pêi pro ai pơxúa tơmiât troh a tíu tơkăng kong, pro chiâng tơdroăng ki hơniâp ro ăm mâu vâi muăn a kơpong tơkăng kong drêng rôh Têt Trung thu.

“Kố cho môi tơdroăng pêi pro ki pơxúa khât ƀă ai pơxúa mơhno hiâm mơno, tơdroăng tơmâng khât dêi mâu khu râ, kơvâ cheăng ƀă dêi khu mô đô̆i gâk tơkăng kong ƀă mâu vâi o phô̆m vâ xông kân ƀă vâi hdrêng a kơpong tơkăng kong. Ing tơdroăng kố mê kum ăm mâu vâi o ai tơdroăng loi tơngah tung tơdroăng tơmâng khât dêi mâu khu râ, kơvâ cheăng vâ mơ-eăm hriâm tâp lĕm tro tâ nếo vâ chiâng mâu ngế kuăn pơlê ki ai pơxúa rơtế ƀă Mô đô̆i gâk tơkăng kong gâk kring krá tơniăn tơkăng kong dêi Tơnêi têa”.