Tiô Pơkâ dêi Ngế pro xiâm hnê ngăn Chin phuh, Khu pơkuâ ngăn mâu Kơpong cheăng kâ ƀă mâu Kơpong hngêi kơmăi kơmok Dak Lak châ mơjiâng ing tơdroăng tơmot chiâng môi Khu pơkuâ ngăn Kơpong cheăng kâ Phú Yên, Khu pơkuâ ngăn mâu Kơpong hngêi kơmăi kơmok kong pơlê Dak Lak ƀă Khu pơkuâ ngăn Kơpong pêi chiâk deăng xúa kơmăi kơmok rơxông nếo Phú Yên.

A hneăng hôp, Vi ƀan hnê ngăn kong pơlê Dak Lak xuân tơbleăng pơkâ rah xo 9 ngế kăn ƀô̆ rak mâu hnoăng cheăng pơkuâ Khu pơkuâ. Pôa Huỳnh Lữ Tân, Kăn pơkuâ Khu pơkuâ Kơpong cheăng kâ Phú Yên, châ rah xo pro Kăn pơkuâ Khu pơkuâ mâu Kơpong cheăng kâ ƀă mâu Kơpong hngêi kơmăi kơmok Dak Lak.

Pôa Đỗ Hữu Huy, Kăn hnê ngăn Vi ƀan kong pơlê Dak Lak pơkâ thế Khu pơkuâ rĕng tơniăn tơkŭm po, rak tơniăn tơdroăng cheăng ôh tá pơtê; tơdrêng amê, mơnhông hnoăng cheăng xiâm tung pơkuâ, tơ'mot 'no liăn cheăng, tŏng kum khu mơdró kâ ƀă mơdêk tơƀrê tơdroăng cheăng dêi mâu kơpong cheăng kâ, kơpong hngêi kơmăi kơmok, kơpong pêi chiâk deăng xúa kơmăi kơmok rơxông nếo tung kong pơlê.