Hngêi trung Mầm non Họa Mi, cheăm Buôn Đôn, kong pơlê Dak Lak nếo châ ‘no liăn pro tơ’nôm môi to hngêi ƀă 3 to lâm hriâm ƀă kơpong hngêi hiê̆u ƀô̆, tâi tâng kơxô̆ liăn ‘no 6 rơtal. Kố cho ivá mơeăm dêi cheăm vâ mơdêk tâi tâng kơxô̆ lâm tâk troh 11 to lâm a hngêi trung ki xiâm ƀă 1 lâm a hngêi trung ki pro a pơlê Drăng Phôk, châ tơdroăng púi vâ hriâm tâp dêi 360 ngế hdrêng tung tâi tâng cheăm. Cô yăo H Nên Ksor, cô Hngêi trung Mầm non Họa Mi, ăm ‘nâi:

“Kố cho hơnăm hriâm apoăng a hngêi trung nếo, lâm hriâm nếo, kơƀăng tăng nếo tâi tâng, pro vâi o vâ troh hngêi trung hriâm hên tâ. Hngêi trung nếo, lâm hriâm nếo, cô yăo phiu ro khât, hâk tơkôm drêng mâu kế tơmeăm xúa tung hngêi trung hiăng ai tŭm, rơpŏng hngêi ƀă hok tro xuân hâk ro, hâi mơdĭng troh hngêi trung nôu pâ djâ dêi kuăn lăm hriâm hên kơdrâm tŭm”.

Ôh ti xê to râ mầm non, mâu hngêi trung râ má môi ƀă râ má péa a cheăm Buôn Đôn xuân châ tơmâng ngăn ‘no liăn pro, roê mâu kế tơmeăm khoăng hngêi trung lâm hriâm dâi lĕm. Drêng mâu lâm hriâm lĕm châ pro, thái cô troh rêm hngêi vâ mơhnhôk hok tro troh lâm. A cheăm tơkăng kong kố, hok tro hdroâng kuăn ngo châ troh 86%; tơdroăng mơhnhôk mâu vâi o troh a lâm tŭm ôh ti xê cho tơdroăng ki tơ’lêi. Pôa Hồ Sĩ Lâm – Ngế ki pơkuâ hngêi trung Râ má môi Y Jút ăm ‘nâi:

“Apoăng hơnăm hriâm kố, Vi ƀan hnê ngăn cheăm hnê mơhno kơtăng khât cheăng mơhnhôk hok tro. Khu pơkuâ hngêi trung ƀă thái cô hiăng troh rêm rơpŏng hngêi vâ chêh mơéa rah xo hok tro tơdrêng a hngêi. Kơnôm mê, troh nôkố 125 tung 125 ngế hok tro tung hơnăm hriâm hiăng châ troh a lâm tŭm. Mâu vâi o lâm 1 xuân hiăng châ tơkŭm troh hngêi trung lâm vâ hmâ ƀă hngêi trung lâm hriâm nếo”.

Tâng môi tiah a râ má môi, tơdroăng mơhnhôk hok tro hlo chía tơ’lêi tâ mê râ má péa, tơdroăng kố trâm hên xơpá pơloăng. Xua hên o hiăng kân, rơpŏng kơtiê mê mơni tơdroăng vâi o pơtê hriâm vâ tŏng gum nôu pâ hên tâ. Hlo tơdroăng khât kố, ôh ti xê to kăn pơkuâ ƀă hngêi trung, mê hên khu tơrŭm, ngế krê ki ai hiâm mơno hơ-ui hiăng rơtế veăng mơhnhôk mâu vâi o pơtối troh hngêi trung. Jâ Võ Thị Loan, phŏ ngế pơkuâ hngêi trung râ má péa Võ Thị Sáu tối:

“Hơnăm hriâm kố, hngêi trung ai 425 ngế hok, lối 80% cho kuăn muăn hdroâng kuăn ngo. Vâ vâi o hmiên tuăn hriâm, pakĭng tơdroăng veăng gum dêi kăn pơkuâ ƀă kơvâ ngăn hnê hriâm, pin ối tơdah xo tơdroăng ki tơdjuôm ivá dêi mâu khu ai hiâm mơno hơ-ui. Rôh apoăng hơnăm, Kŏng an Pơlê kong kân Hồ Chí Minh tơrŭm ƀă Kŏng an kong pơlê Dak Lak diâp 16 ƀô̆ mơéa hriâm, 10 toăng rơxế mai ăm hok tro xơpá, rơtế ƀă 5 toăng kơmăi tĭnh ăm veăng hriâm tin học. Môi khu mơdró kâ tê tơmeăm ngi kong têa ê a kong pơlê xuân gum tơ’nôm 10 toăng rơxế mai ăm hok tro kơpong hngế”.

Vâ châ tơdroăng tơƀrê mê, ối ai tơdroăng veăng rơtế dêi kuăn pơlê tung pơlê cheăm. Krâ pơlê, ngế ki pơkuâ pơlê, mâu khu tơrŭm đoàn theh tung cheăm pơrá tơdjuôm ivá rơtế ƀă hngêi trung séa ngăn, mơhnhôk, vâ ai tŭm tâi tâng vâi hdrêng châ troh hngêi trung tro hơnăm. Jâ H’Đa nê Ƀyă, ngế ki pơkuâ Buôn Đôn, cheăm Buôn Đôn ăm ‘nâi:

“Ngế pơkuâ ƀon rơtế ƀă Khu pơkuâ Hngêi trung, thái cô troh mơhnhôk rêm hngêi nôu pâ hok tro troh hâi pơxiâm mot hơnăm hriâm nếo troh chôu hâi tro chôu. Kơnôm ai tơdroăng tơrŭm, tơmâng ngăn teăm tơdrêng dêi tá pơlê ƀă Khu pơkuâ hngêi trung, mơhnhôk dêi thái cô mê hok tro akố lăm hriâm hên tŭm. Kố cho tơdroăng tơmâng ngăn teăm tơdrêng dêi mâu khu râ kăn pơkuâ, hngêi trung ƀă môu pâ hok tro”.

Sap ing tơdroăng ki ‘no liăn roê tơmeăm xúa tung hngêi trung lâm hriâm, khu thái cô troh ivá mơeăm ôh tá ăm hok tro ki lâi xua rơpŏng hngêi kơtiê xơpá ôh tá châ troh a lâm hriâm, troh nôkố, mâu cheăng hbrâ rơnáu ăm hơnăm hriâm nếo a cheăm tơkăng kong Buôn Đôn hiăng hbrâ rơnáu tŭm, hbrâ vâ mot tung hơnăm hriâm nếo. Pôa Lê Thanh Sơn, phŏ kăn hnê ngăn Vi ƀan cheăm Buôn Đôn, kong pơlê Dak Lak tối rơdêi:

“Tung la ngiâ ah, cheăm kô pơtối ‘no liăn roê mâu tơmeăm khoăng xúa tung hriâm tâp, pơhlêh tơnêi tơníu plông hngêi trung, tơdrêng amê hlối mơnhông ki rơkê plĕng tung hnê hriâm, rak vế tro tơdroăng pơkâ pêi tro má môi ăm hơnăm hriâm nếo”.

Ƀă tơdroăng tơmâng ngăn ‘no liăn dêi Tơnêi têa, tơdroăng veăng gun kơtăng dêi kăn pơkuâ, tơdroăng kơhnâ krâu dêi thái cô, tơdroăng môi tuăn dêi nôu pâ hok tro ƀă tơdroăng veăng gum dêi mâu khu ai hiâm mơno hơ-ui, hơnăm hriâm nếo a cheăm tơkăng kong Buôn Đôn, kong pơlê Dak Lak kô mơnhông ƀă mâu tơdroăng ro khât. Kố xuân cho ivá ăm tơdroăng cheăng hnê mơngế kơpong tơnêi ki ối xơpá kố.