VOV4.Xơ Đăng - Tung 2 hâi lơ 24 – 25/3, tơring Čư Kuin, kong pơlê Dak Lak hiăng tơkŭm po Hneăng hôp kăn teăng mâ Đoân Droh rơtăm Kŏng san Hồ Chí Minh roh má 4, hneăng hơnăm 2022 – 2027. Kố cho tíu Đoân tung kơpong hdroâng kuăn ngo châ Khu pơkuâ Đoân Droh rơtăm kong pơlê Dak Lak rah vâ po hneăng hôp. Tiô tơbleăng a hneăng hôp, tung 5 hơnăm hiăng hluâ, tơdroăng pêi cheăng đoân ƀă tơdroăng droh rơtăm a tơring Čư Kuin hiăng châ tơƀrê hên môi tiah: mơjiâng ƀă rơnêu 31 kơpong, tíu xah hêi ăm vâi hdrêng, hngêi tuăn pâ, hngêi kên pâ rơnŏng khêi ăm kuăn pơlê ƀă hok tro ai tơdroăng rêh ối pá puât.

Kố cho hneăng hôp tung kơpong hdroâng kuăn ngo dêi droh rơtăm Dak Lak

Tŏng kum ƀă hnê mơhno, tơbleăng cheăng pêi ăm 5.500 ngế droh rơtăm ƀă tŏng kum 72 ngế droh rơtăm hrá tơtêk vêh lĕm. Tơkŭm po chât lâm hnê klê têa ƀă hnê tơdroăng rêh ăm vâi hdrêng.  Mâu tíu pêi cheăng Đoân xuân pêi pro châ 44 tơmeăm droh rơtăm, ƀă tâi tâng kơnâ lối 650 rơtuh liăn. Hneăng hôp hiăng rah Khu pơkuâ Đoân Droh rơtăm Kŏng san Hồ Chí Minh tơring Čư Kuin, roh má 4, hneăng hơnăm 2022 – 2027, mê ai 21 ngế ƀă rah xo Kăn pơkuâ hnê ngăn Đoân ối pơkuâ hnê mơhno a hneăng hôp.

A Sa Ly tơplôu [ă tơbleăng