Hên tơdroăng tơ’noăng hiăng chiâng tíu ki eăng, troh lâp lu rơdêi tung tơdroăng rêh ối pơlê pơla: Tơdroăng pêi “Lâp tơnêi têa tơdjuôm ivá mơjiâng thôn pơlê nếo” ƀă 26 cheăm châ plah, 4 to cheăm châ thôn pơlê nếo ki mơdêk, lối 760 tơmeăm OCOP, tung mê, ai 2 tơmeăm 5 hơlŏng. Tơdroăng pêi “Kum mơngế kơtiê – Ôh tá lôi kơbố parŏng” gum djâ kơxô̆ rơpŏng kơtiê kơpong kuăn pơlê hdroâng kuăn ngo kơdroh u ối 9,7%.

Tơdroăng pêi ‘’Kăn ƀô̆, kŏng chưk, viên chưk tơ’noăng pêi pro khôi túa lĕm tro a tíu pêi cheăng’’ ƀă ‘’Hnê kuăn pơlê xúa kŏng ngê̆’’ hiăng mơdêk ó rơdêi pơhlêh xúa kŏng ngê̆ tung tâi tâng tơdroăng pro mơ-éa, 100% mơ-éa châ pro tiô troăng điê̆n tưh.

Pôa Tạ Anh Tuấn – Kăn hnê ngăn Vi ƀan kong pơlê Dak Lak, Kăn hnê ngăn Hô̆i đong kheăn kơdeăn kong pơlê – mơnhên, kố cho Hneăng hôp Tơ’noăng pâ nhuô̆m tơnêi têa apoăng dêi kong pơlê klêi kơ’nâi tơmot chiâng môi, djâ ki kơnâ kal kí trâu hơngế, mơnhên troăng pơxiâm ăm hneăng mơnhông mơdêk nếo – ôh tá xê to tơ’noăng tung rêm kơvâ, mê ối cho tơ’noăng pơhlêh nếo tơmiât pêi rơkê pơkuâ ƀă mơnhông tơdroăng hâk vâ xông mơ-eăm dêi kuăn pơlê.