Tung khế 8, lâp kong pơlê ai 85 rơpŏng păn chu tro tâ pơreăng châi klêa chu châu Phi, pơklât thế prâu tah lối 1.100 to. Riên sap apoăng hơnăm troh nôkố, pơreăng châi klêa chu châu Phi hiăng ai a 35 to cheăm, bêng, pro lối 2.500 to chu tro prâu tah. Nôkố u ối 27 cheăm, bêng ai chu tro tâ pơreăng tá hâi hluâ 21 hâi. Rơtế ƀă pơreăng châi klêa chu châu Phi, mâu pơreăng tâ tú ki rơ-iô ki ê môi tiah hbáu mông tơlŏng kơchuôp chêng, êi kéa lo po pom mơhé tá hâi tâ tú tung khế, laga tơdroăng tơ’lêi pơreăng tâ tú đi đo ai.

Xiâm kối xua pơreăng rêh ton pa kong kong kế, nhâ loăng,  tơ’lêi tâ tú, pro ôh tá tơniăn; tơdrêng amê kơxô̆ rơpŏng păn cho hên, tơdroăng ki tơniăn sinh hok tá hâi châ tơniăn. Pakĭng mê, kong prâi ôh tá tơniăn ƀă ôh tá tŭm khu pơlât mơnăn pro tơdroăng séa ngăn chiâng kơdroh.