Tiô tối tơbleăng a rôh hôp dêi Vi ƀan kuăn pơlê kong pơlê Dak Lak po tung hâi hnah lơ 8/9, troh hâi lơ 28/8, lap tung kong pơlê nếo châ xo lối 3.939 rơtal liăn  ‘no mơjiâng tơmeăm khoăng hơnăm 2025, châ 1/3 pơkâ. Mâu tơdroăng tơkêa bro ki kân mê cho troăng kân tơdrăng Khánh Hòa – Buôn Ma Thuột, troăng kĭng têa kơxĭ Phú Yên, tơmeăm khoăng kơpong cheăng kâ Nam Phú Yên, Kơpong hngêi kơmăi Hòa Tâm, Kơno tuk Bãi Gốc... xuân trâm hên tơdroăng tơvâ tơvân ‘na tơdroăng pro hlámơ-éa ƀă chêl thiăn liăn vâ mơjiâng pro tơmeăm khoăng. Tung pơla mê, hên tơdroăng  tơkêa bro pagong  hngêi rak liăn môi tiah tôh tơrŭm tê mơdró- mâu kơpong ôm hyô ngăn nhâ loăng kuăn kiâ, kơpong hngêi kơmăi ki dâi  lĕm  xuân hrá  tơbleăng pro.

Hlo ti mê, pôa Tạ Anh Tuấn, Kăn hnê ngăn Vi ƀan kuăn pơlê kong pơlê Dak Lak pơkâ thế mâu tíu pêi cheăng, kơvâ cheăng kong pơlê pêi kơtăng rĕng xo liăn vâ mơjiang pro, ngăn mê cho hnoăng cheăng ki kal vâ mơnhông tơƀrê cheăng kâ. Mâu tơdroăng tơvâ tơvân ‘na tơnêi, chêl thiăn liăn, pro hlá mơ-éa  hyôh kong prâi,  pêi pro thế tơkŭm tâh ki xơpá mê  tơdrêng hlối tung khế kô. Malối, Kăn hnê ngăn Vi ƀan kuăn pơlê kong pơlê Dak Lak pơkâ thế pôi ta ám mâu khu mơjiâng pro ki lot veăng pro mâu tơmeăm khoăng, ví tơdroăng ki hrá pro, lơ tơ’nôm liăn pro, lơ pro kơdroh ki tơbrê tung tơdroăng xúa liăn ‘no pro tơmeăm khoăng tơnêi têa.

 Tơdrêng ƀă tơdroăng pơkâ kal mơdêk rĕng xo liăn ngân ‘no mơjiâng tơmeăm khoăng  tơnêi têa, Vi ƀan kuăn pơlê dêi kong pơlê Dak Lak hnê mơhno tăng ngăn, ‘mâi hơ’lêh pơkâ ‘no liăn pro tơmeăm khoăng tơnêi têa hơnăm 2025, tơkŭm liăn ăm mâu tơdroăng mơ-eăm, ai ivá xo liăn hân hên, hbrâ pơkâ ‘no liăn mơjiâng tơmeăm khoăng ton hơnăm 2026-2030. Pơkâ cho  pro pơ’lêh  nhên tung tơdroăng pêi mâu tơdroăng tơkêa bro ki kal, veăng pêi tiô pơkâ tâk lối 10% tung hơnăm la ngiâ.