Rơpŏng nâ H'Unh Hmok ối a ƀuôn Tul A, cheăm Ea Wer, kong pơlê Dak Lak ối tung rơpŏng kơtiê. Tơdroăng rêh ối pá puât pro hnoăng cheăng tŏng kum ăm dêi kuăn troh hngêi trung rêm hơnăm vâ mơhriâm cho tơdroăng ki ôh tá tơ'lêi hlâu. Hên hơnăm hdrối mê hía nah, thái cô Hngêi trung râ má môi Nguyễn Du đi đo tơmâng ngăn, mơhnhôk ƀă tŏng kum rơpŏng mâu tơmeăm ki kal vâ kuăn nâ H'Unh châ pơtối mơhriâm.

“Châ thái cô tơmâng tŏng kum, mơhnhôk mơhé tơdroăng rêh ối pá puât á xuân mơ-eăm ăm dêi kuăn lăm hriâm. Kuăn á ôh tá ai hlá mơ-éa chêh, ôh tá ai hlá mơ-éa mơhriâm lơ ôh tá ai ki klâi mê pin tối ăm thái cô ‘nâi. Tâng lơ ai liăn ngân mê thái cô tŏng kum pin tơdroăng ki mê’’.

Hngêi trung râ má môi Nguyễn Du, cheăm Ea Wer, kong pơlê Dak Lak ai lối 85% kơxô̆ hok tro cho hdroâng kuăn ngo, tung mê, hên vâi o ai tơdroăng rêh ối pá puât. Vâ rak vế kơxô̆ hok tro troh hngêi trung, hngêi trung mơnhên thế 'nâi nhên tơdroăng rêm rơpŏng ƀă hbrâ mơhnhôk hok tro troh hngêi trung lâm. Cô H'Thong Thíp tối ăm ngin 'nâi, sap ing apoăng khế 8, rơtế ƀă tơdroăng tơbleăng tung măng internet xah hô̆i Zalo, Facebook, thái cô ối troh rêm toăng hngêi, malối cho mâu rơpŏng pá vâ châ 'nâi tơdroăng, vâ mơhnhôk nôu pâ djâ dêi kuăn troh hngêi trung.

“Mơhé hiăng tối tơbleăng tung mâu măng internet xah hô̆i môi tiah Zalo, Facebook, la ki hên akố cho hdrông kuăn ngo mê nôu pâ iâ vâ tơmâng. Mâu rơpŏng ki ôh tá châ tơmâng ‘nâi troh tơdroăng tung măng internet, thái cô hdroâng kuăn ngo a tíu kố kô troh a hngêi trăng vâ mơhnhôk mâu nôu pâ nâp hô sơ, tơdrêng amê hnối tơbleăng hâi khế, tíu vâ mâu vâi o troh a hngêi trung”.

Pơtroh hok tro troh a hngêi trung hiăng pá, vâ mâu vâi o hmiân tuăn hriâm mê kal tơ'nôm tơdroăng tŏng kum 'na kơxop hlá mơ-éa chêh, hmân ếo ƀă tơmeăm xúa tung hriâm tâp. Xua mê, mâu thái cô a Dak Lak đi đo mơhnhôk mâu khu tơrŭm, ngế krê tơdjuôm ivá tŏng kum hok tro ai tơdroăng rêh ối pá puât. Kơnôm tiah mê, hên hngêi trung a kơpong hngế hngo, kơpong pá puât xuân ối rak vế 100% hok tro lo lăm hriâm tiô pơkâ ƀă ôh tá ai hok tro pơtê hriâm.

Cô Đỗ Thị Xuân, Kăn pơkuâ Hngêi trung râ má môi Nguyễn Du (cheăm Ea Wer), tối ăm ngin 'nâi, hdrối vâ mot hơnăm hriâm nếo, hên kơxuô tơmeăm pơtối châ diâp troh mâu vâi o hok tro ai tơdroăng rêh ối pá puât, thăm mơhnhôk vâ mâu vâi o troh hngêi trung.

“Hiăng ai péa khu pú hên, ngế krê 'na tŏng kum ăm hngêi trung. Má môi cho mơhnhôk tơlo kơxop hlá mơ-éa chêh, tơmeăm xúa tung hriâm tâp ƀă mâu vâi o ki rơpŏng kơtiê ƀă mâu vâi o ki xơpá. Ƀă pơxiâm mot tung hơnăm hriâm nếo mê hngêi trung xuân hiăng mơhnhôk châ khu pú hên ai hiâm mơno tŏng gum, veăng ăm hngêi trung 170 plâ hmân ếo, kơtong, kơxop hlá mơ-éa hriâm ăm mâu vâi o hok tro ki ối tung rơpŏng kơtiê lơ xơpá”.

Hơnăm hriâm 2026-2027, Hngêi trung phôh thong ai tíu kâ koi ối pơtê râ má môi ƀă râ má péa Ƀuôn Đôn, kong pơlê Dak Lak pơxiâm mot hơnăm hriâm apoăng tiô túa hngêi trung ai tíu kâ koi ối pơtê, ƀă lối 40 toăng lâm ƀă lối 1.100 ngế hok tro. Maluâ tơmeăm khoăng châ 'no liăn mơjiâng pro lĕm, mâu hok tro lâm 1 troh lâm 3 a ƀuôn Drang Phôk xuân trâm pá drêng troh hngêi trung nếo, xua kơtăn ing hngêi troh a hngêi trung sap ing 15 troh lối 20 km. Pôa Thái Văn Lộc, Thái pro Kăn pơkuâ hngêi trung, tối tơdroăng ki ai khât, ing tơdroăng pâ thế dêi mâu nôu pâ, hngêi trung dế pơkâ troăng hơlâ tŏng kum rơxế chơ chiân hok tro.

“Hngêi trung xuân hiăng tơbleăng ăm Vi ƀan cheăm tơbleăng ƀă kong pơlê pâ tŏng kum kơxô̆ liăn vâ ai rơxế chơ chiân mâu vâi kuăn hok tro: kơxo lăm ing ƀuôn Drang Phôk ƀă kơxê tơdah vêh ing hngêi trung phôh thong ai tíu kâ koi ối pơtê, vâ mâu vâi kuăn châ hriâm tâp, pơtâp tung tíu ki lĕm tơniăn, kân rơdâ, tŭm tơmeăm ƀă ai tŭm mâu kơvâ cheăng vâ rak ngăn mâu vâi kuăn châ lĕm tro tâ”.

Mâu tơdroăng a mâu hngêi trung kơpong xơpá ăm hlo, tơdroăng ki pá troh hngêi trung ôh tá xê to a tơdroăng ‘na liăn ngân mê ối a troăng prôk lăm kơtăn hơngế, tơdroăng ki châ 'nâi ƀă tơdroăng rêh ối dêi rêm rơpŏng. Xua mê, hbrâ ăm hơnăm hriâm nếo thế pơxiâm ing tơdroăng ki 'nâi nhên tơrêm tơdroăng pá vâ ai troăng hơlâ tơtro.

Pôa Lương Nguyễn Minh Triết, Kăn cheăng tung Tíu xiâm Đảng, Kăn pơkuâ hnê ngăn Đảng kong pơlê Dak Lak pơkâ thế mâu cheăm, bêng rak tơniăn hngêi trung, thái cô, kơxop mơ-éa hnê hriâm ƀă mâu tơdroăng mơhriâm tâp, malối cho a kơpong hơngế, hơngo, kơpong hdrông kuăn ngo, tíu tơkăng kong.

“Rak tơniăn tŭm tơmeăm khoăng, hngêi trung, kơxop hlá mơ-éa hriâm, tơmeăm xúa tung hnê hriâm ƀă mâu tơdroăng kal vâ xúa tung hơnăm hriâm nếo. Pơtối séa ngăn, mơnhên tối khât tơdroăng hnê ƀă hriâm; ai troăng hơlâ ki nhên mơdêk tơdroăng hnê hriâm kơpong hdroâng kuăn ngo, kơpong hơngế hơngo, kơpong tơkăng kong; kơdroh troăng kân  ki  kơtăn hơngế pơla mâu kơpong; kơdroh kơxô̆ hok tro lôi pơtê hriâm, pơkâ troh ôh tá ai hok tro lôi pơtê hriâm xua tơdroăng rêh ối pá puât”.

Ing môi kơxop hlá mơ-éa chêh, hmân ếo troh rơxế vâ chơ chiân, mâu tơdroăng tŏng gum păng ‘nâng dế gum hok tro kơpong pá puât Dak Lak thăm ai rôh tơ’lêi troh hngêi trung. Kơ'nâi tơdroăng hbrâ ăm môi hơnăm hriâm nếo ôh tá xê to mâu hngêi trung châ 'mâi rơnêu, mê ối cho hiâm mơno mơ-eăm vâ ôh tá ai hok tro ki lâi pơtê hriâm xua tơdroăng rêh ối lơ troăng kơtăn hơngế  ing hngêi ối troh a hngêi trung hriâm.