Dak Lak nôkố ai lối 217.600 ha kơphế ƀă vâ chê 33.800 ha kơxu. Tơdroăng pơkuâ kơpong pêt, mơnhên xiâm kối tơmeăm ƀă séa ngăn ki tơdjâk troh kong ai pơxúa kal khât ƀă ivá rak tơniăn kơchơ tê mơdró dêi péa kơvâ cheăng ki xiâm mê. Nôkố kong pơlê tơbleăng tơdâng tơ'mô mâu hnoăng cheăng, ing mơjiâng tơdroăng chêh 'măn tung kơmăi, séa ngăn tơdroăng kơpong pêt troh mơdêk hlê plĕng ƀă ivá pêi pro dêi khu mơdró, khu pêi cheăng tơrŭm, kuăn pơlê.

Khu xiâm ngăn Khoa hok ƀă Kŏng ngê̆ Dak Lak châ pơcháu mơjiâng, pơkuâ ƀă pêi pro tíu 'măn rak hlá mơ-éa, kum tung tơdroăng tơbleăng mâu tơdroăng pơkâ dêi Khu tơrŭm châu Âu. Khu ngăn chiâk deăng ƀă Hyôh kong prâi kong pơlê Dak Lak ai hnoăng mơjiâng Tôh pêi cheăng EUDR râ kong pơlê vâ tơrŭm tơbleăng mâu tơdroăng cheăng. Khu kăn pơkuâ mâu cheăm, bêng mơdêk tối tơbleăng, hnê mơhno kuăn pơlê; séa ngăn, mơnhên mâu tơdroăng 'na ngế ki pêi pêt, tíu ƀă tơdroăng ki xúa tơnêi tung cheăm.

Kố cho tơdroăng ki kal vâ mơdêk ki tơƀrê dêi tơdroăng chêh 'măn tung kơmăi kơpong pêt, kum tơdroăng ki tơdjêp ƀă tơdroăng chêh 'măn tơnêi tơníu ƀă tơdroăng chêh 'măn ‘na kong.