Tung tơdroăng ki tơdrăng, tơrŭm, péa pâ rơtế vêh mơnhên tối mâu tơdroăng ki kal tung tơbleăng tơdroăng tơpui châ tơƀrê dêi Hneăng hôp roh má môi Vi ƀan tơrŭm cheăng pơla Kuô̆k hô̆i Việt Nam ƀă Kuô̆k hô̆i lâp tơnêi têa Sinuâ khế 8/2025.

Vâ pơtối pro tơrŭm trâu hơngế mâu tơdroăng cheăng pơla péa tơnêi têa tung la ngiâ, pôa Trần Thanh Mẫn, Kăn xiâm hnê ngăn Kuô̆k hô̆i ƀă pôa Triệu Lạc Tế môi tuăn péa pâ pơtối rak vế tơpui tơno khu râ kăn xiâm, pro xiâm kal kí krá tơniăn tâ ăm tơrŭm cheăng tung mâu ƀâng tơpui tơno, mâu kơvâ cheăng, mơnhên rế tơƀrê ăm tơdroăng tơrŭm cheăng krá khât pơla péa pâ, malối cho mơdêk tơrŭm tê mơdró mơnhông tơdâng tơ'mô, krá tơniăn tâ, mơ'no liăn cheăng ki dâi lĕm, tơdjêp troăng rơxế lơtreng tơdâng tơ'mô, pro lĕm tiô túa nếo, mơdêk tơrŭm cheăng khoa hok kŏng ngê̆; ôh tá la lâi pơtê 'mâi mơnhông xiâm rêi pơlê pơla tơ'lêi hlâu ăm tơrŭm cheăng péa tơnêi têa, mơdêk tơrŭm cheăng pơlê pơla, trâm mâ kuăn pơlê, tơrŭm hnê hriâm, khôi túa lĕm tro, ôm hyô; tơrŭm hên troăng krá tơniăn tâ; rơtế pơkuâ tơƀrê troăng tơkăng kong a tơnêi ƀă séa ngăn hlối tơleăng mơnhên mâu tơdroăng ki ôh tá môi tuăn, pơtối rak tơniăn, hơniâp a têa kơxĭ.