A rôh leh, Khu mơdró kâ Dak Lak hiăng vêh tối mâu tơdroăng pêi pro tơdjêp, mơhnhôk tê mơdró, tŏng kum pơ'lêh kơxô̆, pleăng mơheăm tŏng kum pơlê pơla ƀă tơdroăng rêh ối pơlê pơla, khĕn kơdeăn mâu khu pú hên, ngế krê ki kơhnâ rơkê tung tơdroăng mơjiâng ƀă mơnhông kong pơlê Dak Lak. Pôa Phạm Đông Thanh, Kăn hnê ngăn Khu mơdró kâ kong pơlê Dak Lak tối ăm 'nâi, Khu tơrŭm cheăng tơkêa pơtối pro kông tơdjêp, tŏng kum tah lôi pá puât, mơdêk tơdjêp ƀă mơdêk ivá tơbriât cheăng ăm khu mơdró kâ.

“Ngin mơnhên ki kơnâ dêi Khu tơrŭm a tơdroăng ngế tơrŭm châ ki klâi, khu tê mơdró tơdjêp ƀă kơbố, pá puât ki lâi châ tah lôi ƀă rôh tơ’lêi ki lâi châ po. Vâ mơnhông rĕng, krá tơniăn pin kal mơdêk tơdjêp, mơdêk ivá pơkuâ, pơhlêh nếo kŏng ngê̆ ƀă mơnhông uâ bro trâu hơngế, mơjiâng inâi tơmeăm kong pơlê”.

Tiô pơkâ mơnhông cheăng kâ ngế krê, troh hơnăm 2030, Dak Lak mơ-eăm ai lối 29.000 ngế tê mơdró pêi cheăng, kơpong cheăng kâ krê veăng gum lối tơdê GRDP. Tơmiât pêi troh hơnăm 2045, Dak Lak châ pơkâ ai lối 53.000 khu tê mơdró, veăng gum dâng 2/3 GRDP.

Vâ châ pơkâ tơtêk cheăng kâ péa kơxô̆, Dak Lak kal mơnhông châ tơƀrê mâu kơxô̆ liăn, mơngế pêi cheăng pơlê pơla, tung mê ai hnoăng ki kal dêi kơpong khu tê mơdró. Pôa Y Nhuần Byă, Phŏ Kăn hnê ngăn Vi ƀan kong pơlê Dak Lak mơnhên, kong pơlê kô pơtối rơtế gum pơlê pơla khu tê mơdró mơnhông mơdêk.

“Kong pơlê mơnhên pơlê pơla khu tê mơdró cho khu tơrŭm cheăng ki kal tung mơnhông mơdêk. Tơdroăng mơnhông mơdêk dêi khu tê mơdró xuân cho loăng rek vâ vê ki châ tơƀrê pơkuâ ƀă pơhlêh ilĕm tâ tíu mơ’no liăn cheăng tê mơdró. Kong pơlê kô pơtối mơdêk pơhlêh ilĕm tâ pro hlá mơ-éa, mơdêk tơdroăng tơbleăng tơdrăng tung po rơdâ pêi pro mơ-éa cheăng kâ rêh ối ƀă tơnêi têa; tơkŭm tah lôi pá puât, tơvâ tơvân ‘na mơ’no liăn cheăng, tơnêi tơníu, pơkâ pêi, mơjiâng ƀă mơ-éa ki tơdjâk troh tơdroăng mơjiâng pro tơmeăm tê mơdró; thăm tơpui tơno, tơmâng ƀă tơpui ƀă pêi pro teăm tơdrêng mâu tơdroăng pâ thế tơxâng dêi khu tê mơdró”.