A hneăng hôp, kuăn pơlê pâ thế tơkŭm a mâu tơdroăng rêh ối pơlê pơla, hngêi trăng troăng klông ƀă tơdroăng cheăng kâ. Tung mê, kal rĕng 'mâi rơnêu tơdroăng ki tơ'nhê, têa lân lu a troăng ví troăng kân kơxô̆ 1 tơkâ hluâ bêng Bình Kiến; 'no liăn, 'mâi rơnêu hngêi hôp tơdjuôm ƀă tơmeăm hbrâ ví xía vâ kong prâi pro ôh tá tơniăn a mâu kơpong kuăn pơlê rêh ối kơdrâm kuăn pơlê, kơpong hơngế hơngo.

Kuăn pơlê xuân pâ thế tơmâng troăng pơkâ pêi, troăng hơlâ ƀă kăn ƀô̆ a pơlê cheăm ƀă mơngế hơnăm hiăng krâ. Mơgêi rôh trâm mâ kuăn pơlê, pôa Nguyễn Thanh Nghị tơmâng xo mâu rơkong tơpui tối, pâ thế dêi kuăn pơlê; ing mê, pơkâ thế khu râ kăn pơkuâ, kơ koan cheăng kong pơlê Dak Lak klâ xoăng ƀă tơleăng mơnhên klêi mâu tơdroăng ối tung hnoăng pơkuâ.

Mâu tơdroăng ki tơkâ luâ hnoăng pơkuâ kal châ tơkŭm, pơtroh ăm kơ koan ki ai hnoăng séa ngăn. Khu kăn Kuô̆k hô̆i kong pơlê ai hnoăng cheăng séa ngăn, tí tăng ngăn tơdroăng ki tơleăng mơnhên, tơniăn tơdroăng ki pâ thế tơxâng dêi kuăn pơlê châ tơleăng mơnhên.