Hâi xo Mê dai 55 hơnăm ối tung Đảng, pôa Nguyễn Hữu Quyền, ối a tôh kơphô̆ Tân Thành, bêng Buôn Ma Thuột, ôh tá kơtôa ki phoih rơrêk tung hiâm mơno drêng pâ troh mâu khế hơnăm tơplâ. Hơnăm 1970, pôa lăm tơplâ ƀă châ mot Đảng tơdế kong pêt to priât a tơnêi kong têa Kul. Bú pơtăm hâi kơ’nâi mê, mơngế tung vâi pú rah pôa ăm mot Đảng hiăng tơplâ troh hlâ. Rơkong tơhrâ dêi ngế đảng viên drêng mê rơtế ƀă tơplâ, ƀă khŏm khên tơnôu rơtế ƀă dêi vâi pú tung hnoăng tơplâ.

Klêi tơplâ, pôa Quyền pơtối veăng tơdroăng cheăng vâ chê 40 hơnăm. Pơtê cheăng xua hơnăm hiăng krâ hơnăm 2008, pôa xuân veăng pêi cheăng a cheăm, ai 4 hneăng pêi cheăng pro phŏ hnê ngăn chi ƀô̆ ƀă hên hơnăm pro Kăn hnê ngăn Chi hội mâu  hơnăm hiăng krâ. Dế 80 hơnăm, pôa Quyền tối tiah kố, pơtê cheăng ôh tá xê pơtê hnoăng cheăng; ngế đảng viên, drêng ối ai ivá ƀă tơdroăng, xuân kal pơtối rak vế hnoăng cheăng, hnoăng pêi pro ƀă khu tơrŭm ƀă kuăn pơlê.

“Tiô Đảng, pro tơleăng lĕm hdrông mơngế ƀă hiăng ai tơdroăng rêh ối tơniăn lĕm, hlâu hlĕng. Ing hnoăng pơkuâ dêi Đảng, rơxông nôkố pơtối hnoăng dêi pâ pôa, pơtối mê vâ pro ti lâi  pơtối rak vế tơdroăng ton nah dêi Đảng vâ mơjiâng tơnêi têa tiô tơdroăng Pơkâ Hneăng hôp 14 dêi Đảng pơkâ vâ troh hơnăm 2045 tơnêi têa pin kô chiâng môi tơnêi têa mơnhông tơtêk’’.

Tâng rơkong tơhrâ dêi pôa Nguyễn Hữu Quyền châ hdró pơla tíu tơplâ, mê tuăn loi dêi đảng viên Y Hạ Niê Kdăm, ối a tôh kơphô̆ 2 Tân Tiến, bêng Buôn Ma Thuột, châ tơbêng ing mâu khế hơnăm lăm hriâm a peăng Kơnhŏng drêng nếo xiâm châ 8 hơnăm nah.

Sap hơnăm 1955, pôa Y Hạ Niê Kdăm châ hriâm a hngêi trung hnê kuăn ngo peanwg Hdroh dêi Tơnêi têa ƀă 3 hdroh châ trâm Pôa Hồ. Kơ’nâi mê, pôa pro ngế hmâ pêi hnoăng cheăng ki rơkê a Kul, klêi mê nếo, vêh rơtế tung hên hơnăm hnê hriâm phôh thong ƀă tí tăng ‘nâi plĕng hnê ăm hok tro kuăn ngo a Dak Lak. Klêi rêm hnoăng cheăng, pôa Y Hạ Niê Kdăm đi đo tối pơchân tơná rak tơdroăng pêi pro ki lĕm dêi đảng viên hlối pơcháu tuăn loi mê ăm rơxông kơ’nâi.

“Tung rơxông nếo nôkố, chal nếo, ƀă đảng viên athế mơ-eăm ai tuăn loi kơ Đảng. Mơ-eăm rak ki lĕm tro dêi mơngế kŏng san, mơngế đảng viên dêi Đảng’’.

Mâu tơdroăng hơ’muăn dêi pôa Nguyễn Hữu Quyền, Y Hạ Niê Kdăm hlo, ƀă hên đảng viên hơnăm hiăng krâ, mơhé hiăng hên hơnăm kô chiâng pro pơ’lêh tíu pêi cheăng, tơdroăng cheăng, la ôh tá pro mơhía hnoăng cheăng dêi khu tơrŭm ƀă kuăn pơlê. Tơdroăng pơkâ kơxô̆ 21 dêi Khu xiâm pơkuâ hnê ngăn Đảng hneăng má XIII hâi lơ 16/6/2022 mơnhên khu đảng viên cho ngế ki kal pơkâ ivá pơkuâ, ivá tơplâ dêi khu tơrŭm cheăng Đảng; pơkâ thế rêm ngế đảng viên hbrâ rơnáu pơtâp, djâ troăng ahdrối, djâ troăng lĕm, rak vế ki lĕm ƀă pêi pro kơtăng rơkong tơhrâ drêng mot Đảng.

Ƀă đảng viên ki hiăng pơtê cheăng, drêng ối ai ivá, rơkê plĕng ƀă hiâm mơno, tơdroăng ki mơnhông hnoăng cheăng kô pơxiâm ing mâu tơdroăng ki achê: veăng hôp a chi ƀô̆, veăng hnê tối tơdroăng cheăng a pơlê pơla, mơhnhôk kuăn pơlê rak vế pêi pro tiô troăng hơlâ, luât pơkâ, lơ hnê tối ăm mâu rơxông hơnăm ối nếo.

Mâu tơdroăng tơveăng kum mê ôh tá tơpui hên, la cho túa pêi pro dêi ngế đảng viên pơtối rak rơkong tơhrâ ƀă Đảng tung tơdroăng rêh ối, pêi cheăng  rêm hâi. Jâ Tào Thị Nga, kăn ƀô̆ Viê̆n séa ngăn arak luât Kuăn pơlê kong pơlê Dak Lak, tối tiah kố tơdroăng ki djâ troăng ahdrối, pêi ahdrối athế pơxiâm ing tơdroăng rak tro tiô rơkong hiăng tơhrâ ƀă Đảng ƀă kuăn pơlê.

“Á ôh tá kâi piu drêng ối pá kơdâm hlá cơ dêi Đảng á pâ rơkong tơhrâ plâ rơxông mơ-eăm ăm Tơnêi têa, ăm kuăn pơlê, ăm Đảng. 45 hơnăm hiăng hluâ, tơná á tơmiât cho mơngế đảng viên môi tiah ngin kal athế mơ-eăm hriâm ƀă pêi pro ăm mâu rơxông kơ'nâi mơ-eăm cho tơdroăng ki tơmâng xo, mơ-eăm teăm tơdrêng, tơxâng vâ tơnêi têa pin pói vâ mơnhông tung chal nếo”.

Tung hneăng tơplâ nah, hnoăng cheăng dêi ngế đảng viên châ pơloăng mơnúa pơla tíu tơplâ. Tung hneăng hơniâp lĕm, tơdroăng ki djâ troăng ahdrối châ mơhno ing mâu tơdroăng ki achê ƀă tơdroăng rêh ối: tơpui hlối pêi, achê kuăn pơlê ƀă hnoăng cheăng ƀă pơlê pơla.

Tơdroăng pơkâ 21 dêi Khu xiâm pơkuâ hnê ngăn Đảng hneăng má XIII pơkâ thế mơdêk ki rơkê plĕng dêi khu đảng viên rơtế ƀă pơtâp, djâ troăng ahdrối ƀă rak ki tơrŭm krá ƀă kuăn pơlê. Mơgêi 58 hâi lơ 26/6/2026 dêi Khu xiâm kal kí hneăng má XIV pơtối pêi pro Tơdroăng pơkâ 21, tối nhên mơjiâng khu đảng viên tơxâng pơkâ tung rơxông nếo.

Ƀă mâu đảng viên hơnăm hiăng krâ a kong pơlê Dak Lak, rơkong tơhrâ ƀă Đảng châ tơdjêp ƀă mâu tơdroăng pêi pro ki nhên, ing mâu roh hôp chi ƀô̆, veăng hnê tối hnoăng cheăng tơdjuôm troh hnê ăm mâu rơxông nếo.