VOV4.Xơ Đăng - Ƀă tơdroăng ki ‘nâi dâng 500 ngế tâ pơreăng tung pơla 10 hâi ki apoăng dêi khế 1, tơring Lak hiăng chiâng tơring ki má môi dêi kong pơlê Dak Lak dế nôkố cho kơpong khêi – kơpong rơ-iêo ó khât. Hlo pơreăng COVID-19 tâ tú ôh tá tơniăn, mâu khu ki ai tơdjâk troh dêi tơring Lak hiăng khŏm mơ-eăm kơdroh kơxô̆ mơngế tâ, a kơlo ki iâ má môi, vâ rak tơniăn ăm vâi krâ nhŏng o châ tơdah Têt Lo hơnăm nếo tơniăn.

Chiâng F1 drêng ối achê ƀă mâu ngế tro tâ pơreăng a cheăm Dak Nuê, nâ H’Phil Nêung, ối a ƀuôn Bàng, cheăm Dak Liêng, nôkố dế pêi cheăng a cheăm Dak Nuê tối ăm ‘nâi, apoăng nâ xuân tô tuăn, kơ’nâi mê nâ krếo phôn ăm Hngêi pơkeăng cheăm ƀă châ thái pơkeăng, ƀok thái pơkeăng a hngêi pơkeăng cheăm hnê mơhno troăng klâ kơtăn a hngêi xuân môi tiah mâu troăng hbrâ mơdât pơreăng, nâ hiăng pêi tiô ăm dêi tơná ƀă ăm tâi tâng mơngế tung hngêi.

Kơnôm tiah mê, tâi tâng mơngế tung rơpŏng hiăng tơniăn lĕm tơkâ hluâ mâu tơdroăng ki tá hâi ‘nâi apoăng. Nâ H’Phil tối ăm ‘nâi tơ’nôm, klêi kơ’nâi roh hiăng vâ chiâng ngế tro tâ pơreăng, nâ ƀă rơpŏng hiăng hlê plĕng trâu hơngế tâ ‘na ki rơ-iô dêi pơreăng ƀă xuân ‘nâi nhên tâ ‘na mâu tơdroăng hbrâ mơdât pơreăng.

‘’Drêng ‘nâi tơná trâm ƀă F0 môi tiah lâi mê xuân tô tuăn laga rôe tơmeăm djâ a hngêi pro tơdrêng hlối, hơ-oh 1 hâi 2 xôh kơxo ƀă peăng kơxê, klêi mê tiah mê pin pế têa tô tơnăm mê pin hrik. Á pêi pro môi tiah mê hlo tơƀrê lĕm, á hlo tâi tâng mơngế tung rơpŏng pơrá tơniăn lĕm’’.

Tơring Lăk dế thăm pâk pơkeăng vaccine hbrâ mơdât pơreăng COVID-19 ăm kuăn pơlê

Cheăm Dak Nuê nôkố dế cho môi tung 2 kơpong pơreăng ai hên ngế tro tâ pơreăng dêi tơring Lăk. Yươ̆k sih Đặng Thị Mỹ Hạnh, Kăn phŏ pơkuâ Hngêi pơkeăng cheăm Dak Nuê tối ăm ‘nâi: Sap hâi lơ 17/12 troh nôkố tơdroăng pơreăng xông tâ tú tung cheăm xông tâ tú ó ƀă pơreăng xông tâ tú hên ngế tung pơlê pơla, ki tơtrŏng má môi cho pơreăng a ƀuôn Pa ai 80 ngế F0. Ƀă pơreăng kố, cheăm thế kâng kơxái lâp pơlê ôh tá ăm mot lo pa kong ƀă pêi pro tơdroăng ti tăng mơngế tro tâ pơreăng rơdâ tung lâp cheăm.

Ai mâu ngế ki ‘nâ ôh tá vâ tơrŭm pêi cheăng, Hngêi pơkeăng cheăm athế pơtroh ngế troh a chiâk deăng vâ tôe xo têa môh vâ test rĕng ƀă pơtâng tối ăm kuăn pơlê. Nâ Hạnh tối, tơdroăng ki ôh tá vâ tơrŭm dêi kuăn pơlê cho xiâm kối pro pơreăng chiâng tâ tú tung pơlê:

‘’A pơlê á trâm pá puât má môi cho xua khôi túa dêi pơlê, kuăn pơlê pin mê khôi túa ôu drôu xiâm mê ôu tơdjuôm môi triăng, má péa nếo cho tơkŭm ôu kâ tơdjuôm cho hên, pơtâng tối xuân troh rơdâ laga pơ’lêh khôi túa cho tơdroăng ki pá. Má péa nếo, cho drêng mơnhên châ F0 mê vâi ôh tá prôk, vâi krâ tối á ôh tá tâ hlo tâ pơreăng klâi ôh, á mo lĕm, vâi ôh tá vâ pâ prôk troh tiú pơlât ôh, Khu hnê mơhno tá Kăn pơkuâ hnê ngăn cheăng Đảng, Kăn hnê ngăn Vi ƀan chu troh a hngêi mơhnhôk vâ vâi prôk troh tiú pơlât’’.

Thái pơkeăng, ƀok thái pơkeăng tơring Lak toê xo têa môh vâ test rĕng ăm mâu ngế nhôm tro tâ pơreăng

Tiô pôa Nguyễn Thanh Hưng, Kăn pơkuâ hnê ngăn cheăng Đảng cheăm Dak Nuê, tơring Lăk, troh nôkố cheăm hiăng châ hlo lối 250 ngế F0. Tiô tối hdrối pơreăng ối tơ’lêi tâ tú tâng khu râ kăn pơkuâ cheăm ôh tá kơtăng pêi pro mâu troăng hbrâ mơdât pơreăng, xua mê klêi kơ’nâi đi đo châ hlo mâu ngế tro tâ pơreăng tung pơla achê kố, Khu hnê mơhno hbrâ mơdât pơreăng dêi cheăm hiăng hôp ƀă kơtăng mơnhên xiâm kối ƀă pơkâ mâu troăng hbrâ mơdât pơreăng ăm tơtro vâ rĕng mơdât tơdroăng ki tâ tú dêi pơreăng.

‘’Ngin đi đo tơkŭm po hôp hlê plĕng pêi pro tơdroăng ăm khu pơkuâ mâu thôn, pơlê pơtối pơtâng tối ăm kuăn pơlê ki rơhêng vâ tối tung roh Têt Lo hơnăm nếo la ngiâ pêi pro tơtro 5K. Klêi kơ’nâi tơdroăng hbrâ mơdât pơreăng tung cheăm, mê ngin hlo tơdroăng 5K cho tơdroăng ki kal má môi, ki rơhêng vâ tối cho ki pâng rơkong môh xua mê ngin thăm pơtâng tối ăm kuăn pơlê đi đo pâng rơkong môh ƀă rak kơtăn, ôh tá tơkŭm kơdrâm mơngế vâ ví  ai tơdroăng tâ tú pơreăng ăm dêi pó. Tung roh Têt mê mơ-eăm séa ngăn vâ ‘nâi tơdroăng tung cheăm, pro ti lâi tơdroăng hlê plĕng dêi kuăn pơlê chôa ‘lâng mot tung tơdroăng rêh ối ƀă tơdroăng pâng rơkong môh vâ hbrâ mơdât pơreăng’’.

Pôa Phạm Phú Anh, Kăn pơkuâ Tíu xiâm khăm pơlât tơring Lak tối ăm ‘nâi, drêng ai pơreăng xông tâ tú ó, tơring hiăng pơkâ mơ’no mâu troăng môi tiah thăm pơtâng tối vâ kuăn pơlê pêi pro tơtro troăng mơdât pơreăng 5K, thăm pêi pro tơdroăng pâk vaccine, tơniăn tâi khế 1 lâp tơring pâk lối 90% kơxô̆ mơngế sap ing 18 hơnăm tơngi klêng pâk tŭm 2 trum vaccine ƀă rơtế ƀă mê kô pâk trum má 3 ăm mâu ngế ki tơ’lêi tro tâ pơreăng, ƀă pâk ăm hok tro sap 12 troh 17 hơnăm. Tơring xuân hiăng mơjiâng kơpong vâ pơlât F0 a Tíu xiâm khăm pơlât ton ƀă ai 50 xoăng koi pơlât mâu ngế tro tâ pơreăng ôh tá mơhno tơdroăng châi pa kong ƀă mơngế tro tâ pơreăng ôh tá bê râ.

Laga nôkố kơpong kố tá hâi pêi cheăng, ƀă dế cho kơpong tơkôm dêi mâu ngế F0 vâ pơto troh mâu hngêi pơkeăng pơlât COVID-19. Tơdroăng mơdât ôh tá ăm mot lo kơpong ai pơreăng, séa ngăn a kơpong ki tơ’lêi xuân châ tơring tơkŭm mơngế pêi cheăng.

‘’Má môi thăm rah xo tŭm khu mơngế hbrâ mơdât pơreăng dêi lâp tơring ing tơdroăng tâi tâng mâu ngế veăng tung tơdroăng cheăng kố, ing khu hnê mơhno dêi tơring troh cheăm ƀă troh mâu thôn, pơlê, ƀă a cheăm hiăng mơjiâng châ mâu Hngêi pơkeăng cheăm ki troh lâp lu. ‘Na tơmeăm khoăng mê cho hiăng hbrâ tŭm, hngêi pơkeăng cheăm ki lâi xuân ai oxy, ai kơmăi Sensor vâ séa ngăn ki tơniăn tŭm oxy tung mơheăm, klŏng séa ngăn ki tô hngiú, klêi mê pơkeăng xuân hiăng hbrâ tŭm, hiăng hnê mơhno thái pơkeăng, ƀok thái pơkeăng ăm mâu tôh ki rak ngăn pơlê pơla klêi mê hnê mơhno ăm mâu ngế a thôn, pơlê, tá tơdroăng ki test xêh tung pơlê pơla vâ châ hlo mâu ngế F0’’.

Tơdroăng ki veăng kơtăng dêi mâu kơ koan cheăng ƀă khu râ kăn pơkuâ mâu cheăm dêi tơring Lak hiăng djâ mâu tơdroăng ki châ tơƀrê drêng mâu hâi achê kố, kơxô̆ mơngế nếo tro tâ hiăng kơdroh hên. Kố cho tơdroăng ki phiu ro vâ Lak rĕng pơ’lêh mơngiơk râ pơreăng chu a kơpong trĭng khêi ƀă la ngiâ chiâng vêh kơpong ngiêt.

A Sa Ly tơplôu ƀă tơbleăng