Lâp kong pơlê nôkố ai lối 19.500 khu tê mơdró pêi cheăng tung tâi tâng mâu kơvâ cheăng, hên khu tê mơdró hiăng xông troh kơchơ mơdró lâp plâi tơnêi, mơnhên inâi kế tơmeăm khoăng Dak Lak. Rơtế ƀă tơdroăng pêt mơjiâng, tê mơdró, khu ngế tê mơdró ối veăng lăm tŏng gum mơngế pá puât, tŏng gum pá puât.

Sap apoăng hơnăm troh nôkố, GRDP kong pơlê tâk vâ chê 7%, tê ngi kong têa ê châ lối 2,3 rơtal dollars, tê ‘ngré tơmeăm khoăng tâk vâ chê 18%, tíu mơ’no liăn cheăng pơtối xông tơtêk ƀă lối 2.300 khu tê mơdró mơjiâng nếo. Xông tơpui a hneăng hôp, pôa Tạ Anh Tuấn, Kăn hnê ngăn Vi ƀan kong pơlê Dak Lak mơnhên tơdroăng veăng gum dêi pơlê pơla khu tê mơdró, mơnhên khu râ kăn kô rơtế, pơhlêh pro mơ-éa, mơdêk pơhlêh xúa kŏng ngê̆, mơjiâng tíu mơdró tơdrăng lĕm, tơ’lêi hlâu ăm khu tê mơdró mơnhông mơdêk. Roh kố, Vi ƀan kong pơlê diâp Ƀâng kheăn kơdeăn ăm 18 khu pú hên ƀă 30 ngế krê ki ai tơdroăng pêi rơkê má môi.