A chôu phut trâm mâ khu kăn pơkuâ hnê ngăn Đảng kong pơlê Dak Nông hiăng tối tơbleăng troh ăm mâu ngế ki hloh hlê rơkê plĕng, mâu văn ngê̆ sih, khu chêh hlá tơbeăng ‘na mâu hnoăng cheăng ki xiâm dêi kong pơlê ing apoăng hneăng troh nôkố.

Tơdroăng ki mơ’no liăn ngân ăm mơdró klâ hiăng châ ‘mâi mơnhông, kơlo liăn ngân, hnoăng cheăng a mâu râ kong pơlê pơtối châ tơtêk; hơnăm nah, PCI Dak Nông châ ối má 21 tung 63 kong pơlê, pơlê kong kân, ối má môi a kơpong Tây Nguyên. Drêng kố, Khu kăn pơkuâ hnê ngăn Đảng kong pơlê Dak Nông hiăng diâp 34 pri ki chêh tối, chêh bro, mơhno tơbleăng mâu ƀai văn hok, ngê̆ thuât, ƀai hlá tơbeăng ƀă dó inâi “Hriâm tâp ƀă pêi pro tiô tuăn ngoâ, hiâm mơno, túa rêh ối, pêi cheăng Hồ Chí Minh” ăm mâu khu râ, mâu ngế krê ki rơkê kơhnâ khât. Tung mê, a mâu ngế krê, ai 4 ƀai ki châ pri A, 5 pri B, 8 pri C ƀă 12 pro mơhnhôk kheăn.