VOV4.Xơ Đăng - Tiô Khu ngăn cheăng pêi mố đô̆i tro rong ƀă rêh ối pơlê pơla kong pơlê Dak Nông, drêng Têt Lo hơnăm Nhâm Dần 2022, lâp kong pơlê Dak Nông hiăng tơkŭm mâu khu kăn pêi dêi hnoăng cheăng pôu, hbru tơmeăm lối 73 rơpâu hnoăng ăm mâu tíu pêi cheăng, mâu ngế krê ki kơhnâ rơkê, rơpŏng châ tơnêi têa tŏng, mâu ngế ki ai hnoăng ƀă kăch măng. Tâi tâng kơxô̆ kơnâ vâ chê 33 rơtal liăn sap ing liăn dêi Tơnêi têa, tung mê, rêm hnoăng kơnâ sap ing 300 troh 1 rơtuh liăn ngăn kơ tơrêm ngế.

Ki nhên, mâu ngế ki châ xo tơmeăm têt lo hơnăm nếo, cho: Mâu ngế ki ai hnoăng ƀă kăch măng, mâu nhŏng o mâu mố đô̆i ki hiăng hlâ; rơpŏng kơtiê cho hdroâng kuăn ngo; mâu ngế ki châ pơlê pơla tŏng kum; kăn ƀô̆ ki hiăng pơtê cheăng; rơpŏng ai kuăn ‘nĕng dế pêi dêi hnoăng cheăng a Trường Sa, Hngêi trá DK1; pơlê cheăm dêi hdroâng kuăn ngo. Pôa Y Long, kăn phŏ pơkuâ Khu ngăn cheăng pêi mố đô̆i tro rong ƀă rêh ối pơlê kong pơlê Dak Nông ăm ‘nâi:

“Đảng, Tơnêi têa đi đo tơmâng, rak ngăn tŏng kum ăm vâi krâ nhŏng o châ phâi hơtôu. Pơtih tung rôh Têt kố, kong pơlê Dak Nông diâp ăm rêm to pơlê 10 rơtuh liăn vâ vâi krâ nhŏng o kâ têt. Hdrối nah, ai tơdroăng ki mâu ngế ki ai inâi châ tŏng kum la vâi ôh tá châ xo, la hơnăm kố hiăng pơcháu ăm râ cheăm séa ngăn tơrêm rơpŏng. Klêi mê ing tơkŭm po măt trâ̆n, khu lo tŏng veăng tơring vâ séa ngăn mâu rơpŏng kơtiê hiăng tro há. Tâng tá hâi teăm tro mê pơcháu ăm mâu thôn, pơlê séa ngăn, pôi tá ăm ai rơpŏng ki lâi ôh tá châ tŏng kum”.

Katarina Nga tơplôu ƀă tơbleăng