VOV4.Xơ Đăng - Drêng ai pơreăng xông tâ tú ó dêi pơreăng COVID-19 a kong pơlê Dak Nông, pôa Hồ Văn Mười, Kăn hnê ngăn Viƀan kong pơlê hnê mơhno mâu kơvâ, mâu tơring thế mot pêi cheăng kơtăng, mơnhông hnoăng ngế ối a ko tung tơdroăng hbrâ mơdât pơreăng tơdrêng amê pêi pro hnoăng cheăng mơnhông mơdêk cheăng kâ – rêh ối pơlê pơla.

Xêo troh kơxo hâi lơ 23/2, lâp kong pơlê Dak Nông châ hlo 13.169 ngế tro tâ COVID-19. Tung mê ki hên ngế hiăng prêi lĕm lo hngêi pơkeăng. Tung 2 măng tĭng achê kố, tơdroăng pơreăng xông tâ tú a Dak Nông dế xông tâ tú ó, kơxô̆ mơngế nếo tro tâ tung pơlê pơla đi đo tâk.

Rak ngăn mâu ngế tro tâ COVID-19 a Tíu xiâm khăm pơlât Čư Jut, Dak Nông

A roh hôp mơ’no tơdrêng tung um tiô troăng Internet ƀă mâu tơring, pơlê kong kơdrâm ‘na tơdroăng hbrâ mơdât pơreăng, pôa Hồ Văn Mười, Kăn hnê ngăn Viƀan kong pơlê Dak Nông mơnhên, troăng pêi ki kal xuân cho vaccine ƀă 5K. Kăn hnê ngăn Viƀan kong pơlê Dak Nông pơkâ, rơtế ƀă tơdroăng hbrâ mơdât pơreăng COVID-19, khu râ kăn pơkuâ, kơvâ cheăng, tíu cheăng, tơring thế khŏm mơ-eăm pêi pro tơtro hnoăng cheăng mơnhông mơdêk cheăng kâ rêh ối pơlê pơla tung tơdroăng tiah hmâ nếo.

A Sa Ly tơplôu ƀă tơbleăng