Pôa Lê Trọng Yên, Phŏ Kăn hnê ngăn Vi ƀan kong pơlê Dak Nông ăm ‘nâi, kong pơlê ai hên bauxite ƀă hên khu mơdró hiăng nâp hồ sơ ‘no liăn cheăng chiâ xo, mơjiâng pro bauxite ƀă tâi tâng kơxô̆ liăn ‘no pêi cheăng hên. Vâ châ tơbrê, kong pơlê Dak Nông thế mâu kăn ki lăm pêi cheăng pơkâ thế mâu ki ai phep mơnhông ‘no liăn pro troăng rơxế lơ treng  tơdjêp ƀă kơpong Tây Nguyên. Tung mê, Dak Nông pâ thế pro ahdrối troăng rơxe lơ treng Dak Nông - Chơn Thành (Bình Phước) vâ tơdjêp ƀă troăng rơxế lơ treng kơtâu tơkâ luâ châu Á troh kơno tuk Thị Vải, vâ chơ alumin nhôm ki hiăng pro.

Pakĭng mê, kong pơlê pơkâ thế tăng ngăn pro tơ’nôm troăng xe lơ treng ing Dak Nông - Lâm Đồng - Bình Thuận  a tơdroăng pơkâ pro troăng rơxế lơ treng tơnêi têa. Troăng kố kum chơ mâu tơmeăm pê lo ing chiâk deăng ƀă mâu tơmeăm i ê, veăng mơnhông cheăng kâ - rêh ối dêi kong pơlê ƀă mâu kong pơlê tung kơpong.