VOV4.Xơ Đăng - Klêi kơ’nâi Têt Lo hơnăm nếo troh nôkố, a Dak Nông hiăng châ hlo vâ chê 1 rơpâu ngế thái cô ƀă hok tro tro tâ COVID-19. Mơhé mê, nôkố kơvâ hnê hriâm kong pơlê kố xuân tơniăn mâu pơkâ vâ hok tro râ má péa, râ má pái pơtối lăm hriâm tơdrêng. Tiô xêo ngăn dêi Khu pơkuâ hnê hriâm hnê mơjiâng tuăn ngôa rơkê kong pơlê Dak Nông, sap ing hok tro vêh hriâm a hngêi trung tơdrêng klêi kơư’nâi hneăng pơtêt Têt troh nôkố, lâp kong pơlê hiăng châ hlo 132 ngế thái cô ƀă lối 800 ngế hok tro tro tâ COVID-19.

Hok tro sap ing lâm 6 tơngi klêng a Dak Nông pơtối troh hngêi trung hriâm tơdrêng

Xua kơxô̆ mơngế tro tâ ki hên a râ má môi ƀă râ mâm non, xua mê Dak Nông hiăng ăm hok tro râ mâm non ƀă râ má môi tung lâp kong pơlê pơtê pơtân troh hngêi trung hriâm troh drêng ai tơbleăng nếo; pơ’lêh hriâm tiô troăng online, hriâm mơ’no tơdrêng tung um tơvi ƀă thái cô xing xoăng ƀai tâp pro a hngêi.

Mâu râ má péa ƀă râ má pái xuân tơkŭm po hnê hriâm tơdrêng, ƀă bu mâu lâm tơ’lêi tâ tú kô pêi pro hriâm mơ’no tơdrêng tung um tiô troăng măng Internet. Pôa Nguyễn Văn Toàn, Kăn pơkuâ Khu pơkuâ hnê hriâm ƀă hnê mơjiâng tuăn ngôa rơkê kong pơlê Dak Nông tối ăm ‘nâi, Khu pơkuâ hnê hriâm hiăng pơkâ thế mâu hngêi trung pêi kơtăng tiô pơkâ hbrâ mơdât pơreăng, ôh tá tơngôu laga xuân pôi tá préa. Nôkố kong pơlê xuân tơniăn mâu pơkâ ăm hok tro sap lâm 6 tơngi klêng troh hngêi trung hriâm tơdrêng.

A Sa Ly tơplôu ƀă tơbleăng