Tung cheăm nôkố ai môi ilâng kiâ mô đô̆i ƀă 357 tơnâp kiâ. Tung mê, 220 tơnâp kiâ tá hâi châ mơnhên inâi ƀă châ pơkâ séa ngăn ADN vâ mơnhên inâi. Tơtrŏng, sap hâi lơ 28/7 troh lơ 6/8/2026, Khu pơkuâ Mô đô̆i cheăm Đăk Pék, kong pơlê Quảng Ngãi hiăng tơkŭm po khu ki pêi cheăng ti tăng a kơpong thôn 16/5 ƀă ti tăng chiâ rôu xo châ 10 kơxêng kiâ mô đô̆i.

Tung la ngiâ, cheăm Đăk Pék pơtối rak tơdroăng séa ngăn, mơnhên inâi ‘na mô đô̆i, tơnâp kiâ mô đô̆i hlâ tung tơplâ xâ; tơkŭm séa ngăn kơpong tơnêi ‘lâng ƀă mâu tơdroăng ki nếo, tơdrêng amê thăm séa ngăn, tah lôi pá puât, tơniăn tơdroăng pêi cheăng ‘’500 hâi măng’’. Leh tơbâ ƀă ‘mé mâu ngế khên tơnôu hlâ tung tơplâ xâ nếo châ ti tăng chiâ rôu tơkŭm tiô tối hdrối tơkŭm po a hâi lơ 14/8/2026 a Ilâng kiâ Mô đô̆i Đăk Glei.