A tíu mơjiâng pro troăng XL02, Tơdroăng tơkêa bro ki má 3, pơla troăng ki tơkâ luâ cheăm Tân Tiến ƀă Vụ Bổn (kong pơlê Dak Lak, chât toăng rơxế lu, rơxế ben, kơmăi toh cháa kơxu ƀă lối 30 ngế kŏng nhân, kih sư dêi Kŏng ti Veăng tơlo liăn mơjiâng tơmeăm khoăng Tân Nam dế thâ pêi khât tơdroăng cheăng ok cháa kơxu roh má 2 a troăng kân ki pro. Ngoh Cao Văn Hoành, kŏng nhân Đô̆i toh cháa kơxu dêi kŏng ti tối, tơdế hơnăm hdrối nah ngoh bú vêh dêi a hngêi 1 hdroh tê, hâi ki ê pêi cheăng to a kŏng trương pro troăng kân tơdrăng lĕm. Ngoh Cao Văn Hoành ăm ‘nâi:

“A rêm hâi pêi cheăng a kŏng trương châ 6 khế kô, vâi ngoh o tung đô̆i ki toh cháa kơxu dế tơkŭm pêi cheăng troh kơxu, troăng kân ki pro, toh roh má 1 klêi mê toh roh má 2 ăm péa hdrâ. Ngin bú pơtê drêng kong mêi khía kân, ki ê pêi cheăng plâ hâi măng”.

Pôa Phan Xuân Phú, Ngế pơkuâ tơmeăm khoăng mơjiâng pro krâ ‘măn troăng 02 (Tơdroăng tơkêa bro peăng má 3, Kŏng ti veăng Tơlo liăn mơjiâng tơmeăm khoăng Tân Nam) ăm ‘nâi, tơmeăm khoăng ki mơjiâng pro mê kơnâ dâng 1.200 rơtal liăn, kô pro xŏn lối 15km, tơkâ luâ mâu cheăm Tân Tiến, Vụ Bổn ƀă Ea Knếc (kong pơlê Dak Lak). Nôkố tơdroăng mơjiâng pro dế pêi hrá tâng vâ pơchông ƀă tơdroăng pơcháu, mê kŏng ti hiăng mơhnhôk tăng lối 120 toăng rơxế, 200 ngế kŏng nhân, kih sư pêi cheăng plâ hâi măng klâ hên khu pêi, pêi tá hâi pơtê, hâi leh vâ thế rĕng kêi.

Mâu tíu ki kal pêi mê cho toh cháa rôh má 1, má 2 ăm péa tơdroăng, pro troăng prôk ăm kuăn pơlê, pro hang lông troăng vâ tơniăn troăng prôk; pakĭng mê kŏng ti xuâ ai luât pơkâ mơhnhôk kơjo kum mơngế pêi cheăng.

“Mâu ngoh o dêi kŏng ti dế pêi cheăng ta mâu hâi leh “pêi plâ hâi plâ măng”, ƀă kơxô̆ liăn mơhá xuân châ kŏng ti ăm tro tiô hâi khế pơkâ’’.

A tơdroăng tơkêa bro peăng má 2 xua Khu xiâm ngăn mơjiâng tơmeăm khoăng xiâm ki ‘no liăn pro, pro luâ mâu cheăm Krông Á, Yang Mao ƀă Čư̆ Pui, ôh tá xê to tơxup dêi rơpó pêi khât. Ngoh Nguyễn Đình Cường, kih sư ki mơjiâng pro dêi Kŏng ti veăng Tơlo liăn Grup Đạt Phương, tíu pêi mơjiâng pro troăng XL03 ƀă pro 3 to kông ƀă 1 to trŭm vâ mot luâ dêi troăng kân xŏn 2km tơkâ luâ cheăm Čư̆ Pui kong pơlê Dak Lak tối, kố cho tíu pro ki rơ-iô ƀă pá má môi dêi troăng kân. Tâi tâng troăng ki pro cho tung kong kân, tíu ki to thông, ngo rơ-iô, troăng tung kong. Rêm hâi kŏng ti xuân dế ăm hrĭng ngế kŏng nhân pêi cheăng ƀă hên mâu rơxế, kơmăi veăng pro kông ƀă chiâ pro kloh.

“Nôkố 100 ngế dế tơkŭm ok ƀê tong a kông a Km64 pơla troăng tơkâ luâ cheăm Čư̆ Pui; dâng 200 ngế ki ê klâ xoăng pro péa tôh pêi cheăng pro tíu ki vâ  tơdjêp a kông. Ngin dế mơ-eăm pêi tá hâi leh, hâi pơtê vâ troh hâi lơ 30/6/2026 kô hiăng pro klêi kông ƀă klôh”.

Pôa Phạm Văn Hoà - Phŏ Pơkuâ ngăn khu mơjiâng tơdroăng tơkêa ‘no liăn mơjiâng pro tơmeăm khoăng Pêi chiâk ƀă Troăng prôk kong pơlê Khánh Hòa tối, nôkố tíu ki pá ‘na tơdroăng chêl thiăn liăn ki xo tơnêi tíu vâ pro troăng peăng má 1 tơkâ luâ kong pơlê Khánh Hòa xua Khu pơkuâ ‘no liăn pro  hiăng pơcháu tah ki pá. Tíu pêi cheăng dế hnê mơhno ăm mâu khu mơjiâng rĕng tơdjuôm tâi ivá ăm rơxế, kơmăi kơmok ƀă mâu kŏng nhân pêi hlối teăng a mâu hâi ki krá pêi tá mâu hâi kong mêi.

“Xơpá kân má môi cho chêl thiăn liăn xo tơnêi pro troăng la tơdroăng  mê hiăng klêi, la pêi pro a rơnó mêi kô xơpá ƀă thế hmâ. Mâu khu ‘no liăn mơjiâng pro xúa tơdroăng mơdât têa ƀă tơdroăng po troăng cho mơ’no têa ăm hiu troăng ê vâ drêng kong prăng mêi tíu kơchoh ai têa kô rĕng khăng kô châ pơtối pêi. Ing tơdroăng “mơ-eăm pêi drêng kong tô kong mêi’’ mê mâu ngoh o xuân mơ-eăm pêi khât vâ klêi tiô tơdroăng pơcháu”.

Pôa Trương Công Thái, Phŏ kăn hnê ngăn Vi ƀan kuăn pơlê kong pơlê Dak Lak, tối mơhé tơdroăng mơjiâng pro a tơdroăng tơkêa bro rôh má 3 nếo dâng 80%, vâ tối hrá dâng 20%, la ƀă tuăn mơ-eăm pêi cheăng thâ rĕng klêi, ôh tá pơtê mơhé vâ hâi pơtê, hâi leh, pơkâ khŏm pê klêi ăm rơxế kô châ kơtâu a mơ’nui hơnăm 2025. Pôa Trương Công Thái ăm ‘nâi:

“Dak Lak dế mot tung rơnó mêi hngê, ngin hnê mơhno khu mơjiâng pro pơkâ toh cháa troăng pro drêng kong ôh tá mêi; tâng kong mêi mơdoh pong  meăm pro kơnâng kâng kĭng troăng, pro ƀê tông, kơchuâ mơhno hlâ troăng prôk ƀă pro hang lơng pakĭng troăng vâ tơniăn troăng prôk. ƀă tơdroăng mơ-eăm khât ngin tơhrâ kố ăm rơxế châ kơtâu a mơ’nui hơnăm 2025”.

Ƀă tơdroăng mơ-eăm dêi Khu pơkuâ ‘no liăn pro ƀă mâu khu pro, troăng kân tơdrăng ki apoăng tơdjêp ƀă kong ké ƀă têa kơxĭ Nam Trung ƀộ kô pro klêi a hơnăm 2027 po rôh mơnhông tơbrê cheăng kâ-rêh ối, rơtế ƀă kring tơniăn cheăng lêng- kring tơniăn tung tơdroăng rêh ối nếo klêi tơ’mot tơdjuôm.