A rêm tơdroăng tơkêa bro XL01, ối tung Tơdroăng tơkêa bro khu tơmeăm 2 troăng kân ăm phêp rơxế kơtâu têi Khánh Hòa – Buôn Ma Thuột, mâu tíu cheăng hiăng xing xoăng mâu tíu mơjiâng pro ƀeăn ƀĕng tiô troăng pêi ‘’tô pa kong, mêi tung dế’’. Pôa Nguyễn Viết Chung, Kăn pơkuâ tíu mơjiâng pro troăng kân tung kơdâm tơnêi Phượng Hoàng, tối ăm ‘nâi, tíu cheăng dế mơ-eăm mơjiâng pro chêl tơbêng tơdroăng cheăng, ƀă tơdroăng ki veăng dêi 345 kŏng nhân, kih sư ƀă 120 rơxế kơmăi kơmok.

‘’Rơnó tôu ôh tá tơdjâk lối hên troh tơdroăng mơjiâng pro troăng kân tung kơdâm tơnêi, bu tơdjâk mâu tơdroăng mơjiâng pro pa kong cho kông ƀă troăng. Drêng kong prâi xĭng lĕm, ngin hbrâ chôu pêi cheăng plâ hâi plâ măng xing xoăng nhŏng o ok lêk tơnêi hmốu vâ tơniăn châ tơƀrê xuân môi tiah tơdroăng ki mơjiâng pro khu mơ’no liăn cheăng pơkâ. Nhŏng o mơ-eăm hên vâ châ tơƀrê. Pơkâ pêi cho 31/12 kô kêi đeăng tŭm péa troăng kân tung kơdâm tơnêi ƀă ăm rơxế prôk lăm’’.

Xuân tung tơdroăng ki dế mơjiâng pro troăng kân thâ, a khu tơmeăm ki bro XL03, pôa Nguyễn Văn Lê, Phŏ Kăn pơkuâ khu mơjiâng pro troăng kân tung kơdâm tơnêi Čư Te tối ăm ‘nâi, tíu pêi cheăng nôkố hrá pêi pro dâng 5% tâng pơchông ƀă pơkâ pêi. Vâ chêl tơbêng tơdroăng pêi pro, khu tê mơdró dế mơhnhôk dâng 500 kŏng nhân, kih sư rơtế lối 180 rơxế kơmăi kơmok, mơ-eăm pơcháu tơmeăm tro hâi khế tơkêa.

“Nôkố, ngin dế ai lối 150 kŏng nhân, kih sư châ xing xoăng tŭm rơxế kơmăi kơmok mơjiâng pro tŭm 3 tơdroăng mê cho troăng kân tung kơdâm tơnêi, kông ƀă troăng kân. Drêng tơdroăng khế 8 ai mêi khía mê ngin xing xoăng mơngế pêi cheăng drêng kong prăng kô pêi pa kong, kong mêi kô pêi tung kơdâm tơnêi. Tơdroăng cheăng tung kơdâm tơnêi châ klâ pêi pro roh tung môi hâi, thăm pêi pro kơhnâ. Peăng troăng kân tung kơdâm tơnêi peăng hơ-ếo hiăng kêi đeăng; ƀă tung kơdâm tơnêi mê khu ki mơjiâng pro dế mơ-eăm klêi tôh ƀê tong troăng kân tung kơdâm tơnêi ƀă tôh chá kơxu rơgâ troăng kân tung khế 9 la ngiâ’’.

Tơdroăng tơkêa bro tơmeăm ki má 2 troăng kân ăm phêp rơxế kơtâu têi Khánh Hòa - Buôn Ma Thuột ai tâi tâng kơlo liăn mơ’no lối 10.400 rơtal liăn, xŏn vâ chê 37 km, tơkâ hluâ mâu cheăm MDrak, Krông Jing, Čư̆ Pui ƀă Ea Kar (kong pơlê Dak Lak), xua Khu pơkuâ troăng kân ăm phêp rơxế kơtâu têi (Khu xiâm mơjiâng tơmeăm khoăng) pơkuâ mơ’no liăn bro. Troăng kân prôk tơkâ hluâ kong ngo prôk lăm xâu pá, ƀă 4 troăng kân tung kơdâm tơnêi pong hluâ ngo ƀă 38 kông a ngâ.

Nôkố, tơdroăng tơkêa bro troăng kân hrá 8,15% tâng pơchông ƀă pơkâ pêi, nếo châ lối 86% kơxô̆ mơjiâng pro. Vâ chêl tơbêng tơdroăng pêi pro, mâu khu mơjiâng pro dế rak 71 tơdroăng mơjiâng pro, pơtroh 546 toăng rơxế, kơmăi kơmok, rơxế bro ƀă vâ chê 1.400 kih sư, kŏng nhâ, khu ki mơjiâng pro đi đo ‘’3 roh, 4 khu/môi hâi măng’’. Pôa Phan Đình Hạc, teăng mâ tíu hnê mơhno séa ngăn, tối ăm ‘nâi tơdroăng mơjiâng pro a tơmeăm ki bro XL03 tíu pơkuâ.

“Khu mơ’no liăn cheăng hnê mơhno kơtăng, ngin tíu séa ngăn thế đi đo, ai mâ a tíu mơjiâng pro, mơhnhôk mâu khu mơjiâng pro. Ƀă mâu kế tơmeăm ki pơtối nếo ƀă tơdroăng tơkêa bro tơmeăm pro 1 hiăng ăm rơxế prôk lăm sap a ko troăng troh mơ’nui troăng, ƀă tơmeăm ki pro troăng kân tung kơdâm tơnêi Čư̆ Te mê dế tơkŭm tôh ƀê tong mơnât tung klôh ƀă rơgâ troăng. Mâu khu mơjiâng pro khŏm mơ-eăm ăm rơxế chiâng kơtâu a hâi lơ 2/9’’.

Tơdroăng tơkêa bro khu tơmeăm 1 ƀă 3 troăng kân ăm phêp rơxế kơtâu têi Khánh Hòa - Ƀuôn Ma Thuột dế kêi đeăng mâu tơmeăm má mơ’nui, mơ-eăm djâ ăm xúa tung khế 9 la ngiâ. Tâng Tơdroăng tơkêa bro tơmeăm bro 2 chêl tơbêng tơdroăng pro hiăng hrá, lâp troăng kân ăm phêp rơxế kơtâu têi Khánh Hòa – Buôn Ma Thuột kô ăm rơxế prôk lăm a mơ’nui hơnăm kố, djâ tâi tâng troăng ăm rơxế prôk lăm sap apoăng hơnăm 2027 tiô hnê mơhno dêi Chin phuh.