Tung pơla kong dế tôu ó a kong kơhâi dế, pôa Y Ung Byă, a ƀuôn Čuôr, cheăm Ea M’Droh, kong pơlê Dak Lak dế ối mơ-eăm meăn pro dêi hngêi. Péa ngế ki pêi gum dế hơ’lâk prêi xơmong, poê meăm, mê kơdrâi pôa dế pơtroh kông tơdrá vâ hếo pro. Hngêi rơdâ 72 met karê dế hiăng vâ pro kêi. Pôa Y Ung ăm ‘nâi, rơpŏng kơtiê ai 6 ngế tung hngêi, sap ing ton nah xuân tơchĕng tơmiât ai hngêi ối ki krá. Nôkố, Chi ƀô̆ Kŏng an cheăm Ea M’Droh gum liăn roê hmốu prêi xơmong vâ pro hngêi, pôa Y Ung mung tơ’nôm mâu ngế cheăng pro ƀă pôa hlối cho ngế ki meăn pro hngêi ki pôa tơchĕng tơmiât kố:

“Ai hngêi ối mê gá ro, tiô tối hdrối kô mơ-eăm pêi cheăng kâ, mung tơ’nôm nhŏng o hdrông hdrê veăng pro vâ rĕng pro kêi. Hngêi kố cho ivá vâ pơtối mơ-eăm pêi cheăng kâ, păn roăng kuăn ‘nĕng hriâm tâp troh tui lui, mơ-eăm vâ hluăn ing kơtiê”.

Xuân a ƀuôn Čuôr, rơpŏng pôa Y Đek Eñuôl nếo mot ối tung hngêi nếo ki lĕm krá. Pôa Y Đek phiu ro khât, ƀriê tung tuăn mơno xua vâ chê 30 hơnăm hdrối, tá rơpŏng pôa rêh ối tung hngêi tâl ki ton, kuâ lêm tôl hiăng rong tơ’nhiê. Sap ing khế 8 hơnăm nah, rơpŏng pôa châ Chi ƀô̆ mâu kơ koan Đảng cheăm Ea M’Ddroh tŏng gum, đi đo pôu kơ-êng, mơhnhôk. Ôh tá xê tŏng gum to péa pŭm ro, Chi ƀô̆ mâu kơ koan Đảng cheăm ối gum lối 95 rơtuh liăn pro hngêi Tơrŭm. Ai hngêi, ai troăng prôk mơnhông cheăng kâ, pôa Y Đek hmiân tuăn pêi cheăng kâ ƀă tơmiât tơdroăng cheăng tung la ngiâ.

“Á ai mung tơ’nôm mâu nhŏng o tung hdrông hdrê châ 40 rơtuh liăn vâ châ pro hngêi ki môi tiah kố. Nôkố hiăng ai hngêi mê hiăng hmiân tuăn mơ-eăm pêi cheăng kâ, choâ ‘lâng mơdrếo mâu kơxô̆ liăn chĕn, mê nếo pơtối broăng tơ’nôm liăn vâ pro hngêi pế pơchên hmê ƀă mâu kơbong ki hum, kơbong lăm dế, tâng ai liăn nếo mê á pro tơ’nôm veăng koi ki kân rơdâ tâ”.

Tiô pôa Y Sắk Kbuôr, ngế pơkuâ ƀuôn Čuôr, ôh tá xê lăm troh tŏng gum liăn môi xôh mê ah vâi prôk, mâu chi ƀô̆ ối tơrŭm, lăm pôu kơ-êng, séa ngăn, hnê mơhno, tơdjêp veăng mơhnhôk tơlo liăn ƀă mơhnhôk mâu rơpŏng rế hía rế tơniăn tung tơdroăng rêh ối. Túa pêi kố gá nếo la hiăng pơxúa tơƀrê khât, gum mâu rơpŏng kơtiê ai tíu ối tơniăn, rế hía rế mơ-eăm. Ƀuôn Čuôr nôkố ai lối 370 rơpŏng la vâ chê 100 rơpŏng ối tung rơpŏng kơtiê ƀă vâ chê kơtiê, pôa Y Sắk tơngah:

“Sap ing túa pêi mê ai hên tơdroăng ki tŏng gum, kuăn pơlê ai troăng tơmiât mơnhông tâ, hiăng gum ăm hdrê ro păn, pro ăm hngêi ối, chiâng tơdroăng ki loi tơngah, ivá vâ vâi krâ nhŏng o mơ-eăm pêi cheăng kâ, mơ-eăm tung rêh ối. Rơhêng vâ la ngiâ ah kô ai tơ’nôm hên tơdroăng ki tŏng gum, rơtế prôk môi tiah kố vâ mâu rơpŏng xơpá kô ai tơ’nôm liăn ngân vâ hluăn ing kơtiê, mơnhông cheăng kâ”.

Ƀă lối 7.000 rơpŏng kuăn pơlê, tung mê, vâ chê 900 rơpŏng kơtiê ƀă vâ chê kơtiê, vâ pêi châ mâu tơdroăng pơkâ pêi ôh tá ai xếo rơpŏng kơtiê a hơnăm 2030 tiô Pơkâ Đảng ƀô̆ kong pơlê Dak Lak, cheăm Ea M’Droh ôh tá to tơkôm tung mâu troăng hơlâ tŏng gum. Klêi kơ’nâi ‘mot tơkŭm ƀă xúa kăn pơkuâ kong pơlê 2 râ, Đảng ủi cheăm hiăng hriăn ngăn tơbleăng túa pêi “Rêm khu tơrŭm Đảng rơtế prôk ƀă rơpŏng kuăn pơlê vâ hluăn ing kơtiê”, mơhnhôk mâu chi ƀô̆ tŏng gum mâu rơpŏng, rơtế lêi tah xơpá, hnê mơnhông cheăng kâ ƀă tơdjêp mâu kơxô̆ liăn tơlo gum.

Klêi kơ’nâi môi hơnăm, túa pêi kố hiăng châ tơbleăng a 4 chi ƀô̆, veăng gum ‘nhiê tah hngêi ối pơtân, gum pŭn túa cheăng kâ ăm mâu rơpŏng. Pôa Nguyễn Văn Đông, Phŏ pơkuâ ngăn Đảng ủi cheăm Ea M’Droh ăm ‘nâi, cheăm dế tơmiât troh vâ mơjiâng túa pêi vâ rêm chi ƀô̆ ối tung Đảng ƀô̆ chiâng tíu tŏng gum ăm kuăn pơlê.

“Tơngah kân má môi ôh tá xê pin tŏng gum châ to lâi kơxô̆ liăn, to lâi to toăng hngêi, to lâi to hdrê ro păn mê cho pro tơdroăng loi ăm kuăn pơlê hdrông kuăn ngo tiah kố ôh tá ai kơbố ki lâi tro lôi pá rŏng ƀă đi đo ai kăn ƀô̆ pơkuâ cheăm rơtế veăng tŏng gum. Tơdrêng amê hlối veăng gum ăm kăn ƀô̆, đảng viên drêng lăm pêi tơdroăng ki ai khât mê cho achê kuăn pơlê, hlê kuăn pơlê hên tâ nếo”.

Klêi kơ’nâi mâu tơdroăng pêi pro tơƀrê ki apoăng, Đảng ủi cheăm Ea M’Droh dế hbrâ vâ mơgêi túa pêi vâ pơtối pêi pro klêi ƀă po rơdâ tơbleăng pro a mâu chi ƀô̆ tung hngêi trung hriâm, ƀă tơngah kô tơdjâk tơdroăng ki veăng rơtế prôk troh hên kơvâ cheăng tung tơdroăng rêh ối dêi cheăm bêng.