VOV4.Xơ Đăng - Ƀă hiâm mơno mơ-eăm, pro kro mơdrŏng a tơnêi xiâm dêi tơná, hên droh rơtăm a tơring kơtiê Ƀuôn Đôn, kong pơlê Dak Lak hiăng tơnôu tăng troăng prôk nếo vâ pơxiâm pêi cheăng ƀă rơtế tŏng kum dêi rơpó mơnhông.

Vêh pêi cheăng klêi kơ’nâi mâu hâi pơtê Têt Lo hơnăm nếo Nhâm Dần, ngoh Hồ Thế Mỹ, ối a cheăm Ea Ñuôl, tơring Ƀuôn Đôn, kong pơlê Dak Lak dế thăm tơdjêp ƀă mâu tíu rôe, tíu tê ‘ngré vâ po rơdâ tíu tê ăm tơpăng kong têa ê. Nôkố, lối 10 ha tơpăng kong têa ê dêi Kŏng ti tơlo liăn cheăng tê mơdró tơmeăm pêi lo ing chiâk deăng hưh cơ Việt Nguyên (xua ngoh Mỹ pơkuâ) ƀă tơdjêp ƀă kuăn pơlê pêi chiâk deăng hiăng troh rơnó đôu xo. Rêm hâi, môi ha kô đôu xo châ dâng 1 tă troh 1 tă tơdế tơpăng drêh kong têa ê, ƀă kơlo tê yă sap ing 40 rơpâu liăn/kilô tơngi klêng tiô  túa tơpăng.

Tối tơdroăng pơxiâm tăng cheăng pêi, ngoh Mỹ tối ăm ‘nâi, sap mơ’nui hơnăm 2018, ngoh mơhnhôk rơpŏng khên tơnôu lâk tah 5 sao kơphế, pơ’lêh pêt tơpăng kong têa ê. Rế pêt rế lăm hriâm túa ki rơkê tơtro pêt rak ngăn tơpăng kong têa ê a mâu kong pơlê, ngoh tơkŭm mâu ngế pú hmâ ki môi troăng pêi cheăng vâ mơjiâng kŏng ti, tơdjêp tíu tê.

Ngoh Hồ Thế Mỹ hơ’muăn:

‘’Á trâm hên tơdroăng pá ‘na hdrê, kih thuât mê á hiăng chu mâu kơpong pêt hên vâ hriâm tâp. Mâu kơpong tơnêi ki pêt mâu loăng plâi ton hơnăm tơnêi ôh tá hơpok lĕm mê pêt tơpăng kong têa ê, pro ăm tơnêi hơpok, rak ngăn ôh tá xúa phon hóa hok mê tơpăng kong têa ê xông rơdêi lĕm. Á rơtế ƀă pái ngế pơxiâm tăng cheăng pêi ƀă kŏng ti Việt Nguyên, mơnhông mơdêk ó rơdêi tâ, mơjiâng rơdâ tâ troăng pêt tơpăng kong têa ê kố. Djâ gá troh kuăn pơlê, hnê kih thuât, tŏng kum hdrê, phon rơvât, ƀă rơtế kuăn pơlê mơnhông mơdêk pêt tơpăng a kơpong tơnêi Buôn Đôn kố’’.

Ngoh Hồ Thế Mỹ (peăng hơ’vá) tơbleăng ‘na kơdrum tơpăng kong têa ê ƀă tơmối troh ngăn

Pói vâ tơdjêp vâ tŏng kum rơtế dêi pó mơnhông mơdêk, khế 10 hơnăm 2021, mâu droh rơtăm dế pơxiâm tăng cheăng pêi a Ƀuôn Đôn, ing khu râ Đoân droh rơtăm ƀă Khu pơkuâ droh rơtăm tơring hiăng mơjiâng kâu lăk ƀô̆ pơxiâm tăng cheăng pêi.

Ngoh Nguyễn Văn Hải, Kăn pơkuâ Kâu lăk ƀô̆ tối ăm ‘nâi, ƀă pơkâ xiâm kum ăm mâu pú hmâ pơxiâm tăng cheăng pêi châ tơ-ƀrê, kâu lăk ƀô̆ dế tơdjêp mâu khu râ, khu mơ’no liăn cheăng ƀă mâu ngế ki rơkê vâ pơtối tŏng kum, hnê mơhno ăm droh rơtăm.

‘’Rêm khế kô ai môi tơdroăng kơphế pơxiâm tăng cheăng pêi, krếo mâu ngế ki rơkê hnê lơ mâu ngế pêi start up hiăng pêi rơkê vâ tơpui tơno ƀă pơlê pơla ki pơxiâm tăng cheăng pêi. Trâm mâ, tơpui tơno tơdroăng pơla mâu khu, kơvâ cheăng môi tiah Ƀơrô Pơkuâ ‘na pêi chiâk deăng – Kơbong cheăng kâ – Hngêi trăng, troăng klông ‘na mâu troăng hơlâ mơhnhôk pêi chiâk deăng, tŏng kum; tơbleăng tơdroăng rơdâ troh mâu pú hmâ pơxiâm tăng cheăng pêi tung pơlê pơla pơxiâm tăng cheăng pêi. Lăm ngăn mâu troăng pêi, tơdjêp mâu troăng pêi ƀă mâu tíu ki tê ƀă mâu tíu mơđah tơbleăng, khu chêh hlá tơbeăng vâ châ tê ăm mâu tíu cheăng ki pơxiâm tăng cheăng pêi’’.

Kâu lăk ƀô̆ pơxiâm tăng cheăng pêi tơring Ƀuôn Đôn lăm ngăn mâu tơdroăng pơxiâm tăng cheăng pêi

Tiô ngoh Nguyễn Quang Trung, Kăn pơkuâ hnê ngăn cheăng Đảng Đoân tơring Buôn Đôn, rơtế ƀă mơjiâng Kâu lăk ƀô̆ pơxiâm tăng cheăng pêi, vâ mơnhông mơdêk ivá hơnăm ối nếo ƀă hiâm mơno khên tơmiêt, khên pêi dêi đoân viên, droh rơtăm tung pơla kố nah, mâu khu pêi cheăng Đoân, Hô̆i a tơring hiăng pêi pro hên tơdroăng tŏng kum droh rơtăm mơnhông mơdêk cheăng kâ, môi tiah: tơkŭm po mâu lâm hnê mơhno, mâu roh pơtâp ‘na pơxiâm tăng cheăng pêi.

Tơrŭm ƀă Hngêi arak liăn kum rêh ối pơlê pơla tơring teăng mâ ăm droh rơtăm mung liăn, mơ’no liăn tŏng kum pơxiâm tăng cheăng pêi ƀă hía hé, ƀă tâi tâng kơxô̆ liăn lối 66 rơtal liăn kum droh rơtăm pêi pro mâu tơdroăng tơkêa bro mơnhông mơdêk cheăng kâ.

Ngoh Nguyễn Quang Trung tối:

‘’Ngin mơ-eăm mơjiâng môi hiâm môn pơxiâm tăng cheăng pêi tung droh rơtăm, pro tơ’lêi hlâu ăm mâu droh rơtăm châ mung liăn vâ mơnhông mơdêk, mơjiâng mâu hneăng tơpui tơno vâ ăm mâu pú kô chiâng tơdjêp, vâ tah lôi mâu tơdroăng pá puât tung tơdroăng pêi pro mâu start up tung pơlê dêi tơná. Á xuân pói vâ khu râ kăn pơkuâ hnê ngăn cheăng Đảng, khu râ kăn pơkuâ tơring tơmâng tŏng kum troh tơdroăng pơxiâm tăng cheăng pêi, ki rơhêng vâ tối cho tơdroăng pơxiâm tăng cheăng pêi rơxông ối nếo tung tơring. Mâu troăng hơlâ tŏng kum dêi Chin phuh, dêi kong pơlê mê kal ai mâu tơdroăng tơkŭm nhên ƀă môi tuăn sap apoăng troh tá tui lui, ton xŏn ƀă pro tơ’lêi hlâu hên tâ ăm tơdroăng pơxiâm tăng cheăng pêi tối tơdjuôm xuân môi tiah tơdroăng pơxiâm tăng cheăng pêi rơxông ối nếo tối krê dêi tơring’’.

H’Xíu H’Mok chêh

A Sa Ly tơplôu ƀă tơbleăng