Tung 2.900 ngế vâi rơtăm ki lăm pro mô đô̆i dêi kong pơlê Gia Lai hơnăm kố, ai 2.400 ngế kô pêi pro dêi hnoăng cheăng cho pro mô đô̆ a mâu đông môi tiah Kuân đoân 34, Kuân khu 5, Kuân chung Phòng không-Không kuân, ối tung Khu xiâm pơkuâ ngăn lêng tơnêi têa, Mô đô̆i gak tíu tơkăng kong dêi kong pơlê Gia Lai; ƀă 469 vâi rơtăm kô veăng mot pêi pro hnoăng cheăng ối tung Khu xiâm pơkuâ ngăn Kŏng an.

Ki rơhêng vâ tối, tung roh ki lăm pro mô đô̆i hơnăm kố, kong pơlê ai 36 ngế vâi rơtăm cho đảng viên. Vâ hbrâ ăm hâi ki pơcháu vâi rơtăm lo lăm pro mô đô̆i hơnăm kố, mâu tơring, cheăm, pơlê kong krâm, pơlê kong kơdrâm hiăng tơrŭm po mâu hâi trâm mâ, hbru tơmeăm ƀă mơhnhôk mâu nôu pâ, rơpŏng hngêi ki ai kuăn 'nĕng lăm pro mô đô̆i; tơdrêng amê, hnối hnê pơtâng 'na Luât lăm pro mô đô̆i, gum thăm mơdêk hiâm tuăn mơno dêi kuăn pơlê ƀă mâu vâi rơtăm ki tro hơnăm vâ lăm pro mô đô̆i pơla kố.