VOV4.Xơ Đăng - Măng tĭng hdrối, a kơpong Tây Nguyên, kơxô̆ mơngế tâ pơreăng COVID-19 pơtối tâk hên. Mâu kong pơlê tung kơpong hiăng rơkê tung hnoăng cheăng pơlât mâu ngế ki tro pơreăng ƀă tơkŭm po hnê hriâm. Tơdroăng kố rế kum ăm mâu ngế ki ôh tá râ ai hiâm mơno tơniăn tâ, kơdroh ăm mâu hngêi pơkeăng, tơdrêng a mê hlối rak tơniăn tung hnoăng cheăng hnê ƀă hriâm.

Klêi kơ’nâi test rĕng a hngêi pơkeăng cheăm bêng Yên Thế, nâ Bùi Thị Như Hoa, ối a kơxô̆ 79, troăng Lê Văn Sỹ, pơlê kong kơdrâm Pleiku, kong pơlê Gia Lai mê châ hlo yương tĭnh ƀă SARS-COV2. Nâ Hoa hiăng châ pâk 3 trum vaccine hbrâ mơdât COVID-19, tá hâi hlo kơ-o, tơngê hiăng pơkâ thế châ klâ kơtăn, pơlât a hngêi. Rêm hâi, nâ rak ngăn xêh ivá, mơdêk châ chăn mo dâi ƀă khăm ngăn ki tô tung châ, pơtroh tơdroăng ăm kăn ƀô̆ khăm pơlât bêng. Ing tơpui phôn, nâ Hoa tối ăm ‘nâi, tơná tâ pơlât a hngêi môi tiah nôkố cho tơniăn lĕm:

‘’Rêm hâi, á tơpui tiô troăng zalo ƀă kăn ƀô̆ khăm pơlât. Á ôh tá ai kơ-o, tơngê klâi ôh, xua mê a mơdêk ivá kâi hbrâ mơdât pơreăng ƀă troăng ô kâ tŭm trếo piê kơhiêm, ô hên têa krui ngeăm, ô hên têa, ô hên têa mơdêk ivá, mơdêk ivá hbrâ mơdât pơreăng. Á pơlât xêh a hngêi, tâng lăm a hngêi pơkeăng tơ’lêi tâ tú dêi pó, lơ thăm râ tâ mê. Xua mê á hlo tơdroăng châ pơlât a hngêi xuân hôm ‘nâng ƀă tơtro’’.

F0 a hngêi cheăm Diên Phú, Plei Ku

Ƀok thái pơkeăng Lê Thiện Thanh – Phŏ pơkuâ Tíu xiâm khăm pơlât pơlê kong kơdrâm Pleiku, tối ăm ‘nâi, sap ing tơdế khế 2 troh nôkố, pơlê kong kơdrâm hiăng ăm lối 600 F0 ki ôh tá râ pơlât xêh a hngêi. Nôkố, bu ai pá kơdâm 1/5 kơxô̆ mơngế tro tâ pơreăng tung môi hâi, ki hên cho mơngế krâ, mơngế ai tơdroăng châi tung châ thế mot pơlât a hngêi pơkeăng. Pôa Thanh tối ăm ‘nâi, drêng nôkố iâ mơngế pêi cheăng, mâu hngêi pơkeăng cheăm, bêng dế pơtroh kăn ƀô̆ tơrŭm ƀă tôh COVID-19 pơlê pơla tung séa ngăn ivá mơngế tro tâ pơreăng; tơniăn teăm tơdrêng thâ pơlât, pơtroh mâu ngế tro tâ pơreăng troh hngêi pơkeăng tâng lơ châi râ:

‘’Khu ƀok thái pơkeăng a 1 bêng bu ai sap ing 5 troh 6 ngế, pêi hên tơdroăng cheăng, rêm hâi thế krếo mâu F0, pơlât mâu ngế ki tơngê, kơ-o, ôh tá kâi hiêm, xua mê ngin xuân mơjiâng châ 3 khu pơlât troh lâp lu, vâ hbrâ tíu ki lâi lối kơdrâm hên mê thăm pơtroh mơngế pêi cheăng tung môi pơla. Drêng lâi mâu hngêi pơkeăng cheăm bêng tơniăn mê tơvêh mơngế pêi cheăng, lăm pêi cheăng a hngêi pơkeăng cheăm bêng ki ê’’.

Kăn ƀô̆ ƀok thái pơkeăng bêng Yên Thế tôe xo têa môh ăm hok tro

A pơlê kong kơdrâm Ƀuôn Ma Thuột, kong pơlê Dak Lak, drêng ai tơdroăng F0 tung hngêi trung tâk rĕng, hên hngêi trung hriâm rĕng kâi trâng, pơhlêh troăng hnê hriâm ing tơdrêng pơhlêh hriâm mơ’no tơdrêng tung um tiô troăng măng internet. Rơtế ƀă troăng pêi ‘’2 tung 1’’, rế hriâm tơdrêng rế hriâm mơ’no tơdrêng tung um tiô troăng măng internet cho tơdroăng mơ-eăm tơniăn hiêm mơno thái cô, hok tro drêng ai mơngế F0 tung hngêi trung hriâm tâk hên.

Nếo lăm hriâm tơdrêng châ 1 măng tĭng, kơxô̆ mơngế tro tâ COVID-19 tâk rĕng tung hngêi trung, Viƀan pơlê kong kơdrâm Ƀuôn Ma Thuột ai mơ-éa pơkâ thế mâu hngêi trung mâm non, râ má môi ƀă hok tro lâm 6 pơhlêh hriâm mơ’no tơdrêng tung um tiô troăng măng internet. Rơpŏng nâ Trần Thị Đông a bêng Tân Thành, pơlê kong kơdrâm Ƀuôn Ma Thuột ai 2 ngế kuăn thế vêh hriâm mơ’no tơdrêng tung um tiô troăng măng internet. Nâ Đông môi tuăn troăng tơkê pêi ƀeăng ƀĕng kố.

‘’Nôkố pơreăng môi tiah kố mê á môi tuăn tơdroăng hriâm online laga xuân pói vâ la ngiâ pơreăng châ mơdât mê mâu vâi o châ troh hngêi trung xua tơdroăng hnê mơhno dêi hngêi trung kô tơtro tâ, nôu pâ hok tro kô hmiên tuăn tâ’’.

Lâm 9A, hngêi trung Lạc Long Quân, pơlê kong kơdrâm Ƀuôn Ma Thuột rế hriâm tơdrêng rế hriâm mơ’no tơdrêng tung um tiô troăng măng Internet

Drêng kơxô̆ mơngế F0 rế hiá rế hên tung hngêi trung hriâm, bu tung 1 măng tĭng, pơlê kong kơdrâm Ƀuôn Ma Thuột châ hlo lối 40 ngế tro tâ cho thái cô ƀă lối 430 ngế cho hok tro. Ƀơro Hnê hriâm – Hnê mơjiâng tuăn ngôa rơkê pơlê kong kơdrâm hiăng tơbleăng Viƀan pơlê kong kơdrâm ăm pơtê pơtân troh hngêi trung ƀă hok tro tâi tâng mâu khô̆i, lâm, bu lâm 9 ƀă lâm 12 chiâng hriâm tơdrêng. Laga, tiô mơnhên, a khô̆i lâm 9 ƀă lâm 12 dêi hên hngêi trung, mâu kơƀâng hriâm ôh tá ai hok tro hlo rế hía rế hên. Nôkố khô̆i lâm 9 dêi hngêi trung râ má péa Lạc Long Quân xuân hriâm tơdrêng ƀă dâng 50% tâi tâng kơxô̆ hok tro, kơxô̆ hok tro ki ê thế hriâm online. Hngêi trung hiăng ai 38 ngế F0 cho thái cô, hok tro. Pôa Phan Thanh Thủy, Thái pơkuâ hngêi trung râ má péa Lạc Long Quân, pơlê kong kơdrâm Ƀuôn Ma Thuột, kong pơlê Dak Lak tối ăm ‘nâi:

‘’Ki hên mâu F0 tâk rĕng a hngêi trung cho a mâu tíu xiâm ối pơtân, ngin hiăng tơpui ƀă mâu tíu xiâm ối pơtân ai păn hok tro drêng ai  ngế F0 pơkâ thế ai troăn g tơbleăng ƀă kơ koan cheăng vâ hbrâ ăm mâu muăn hmiên tuăn troh hriâm’’.

Tiô jâ Mai Thị Hồng Hà, Kăn pơkuâ hnê hriâm – Hnê mơjiâng tuăn ngôa rơkê pơlê kong kơdrâm Ƀuôn Ma Thuột, kong pơlê Dak Lak, pơreăng COVID-19 a Dak Lak pơtối xông tâ tú râ ó ƀă rơpâu ngế tro tâ rêm hâi. A mâu hngêi trung, mơhé tơdroăng ai ngế tro tâ pơreăng hiăng ai tơdroăng ki hbrâ hdrối laga kơxô̆ F0 thăm tâk hên hiăng tơdjâk kân troh hiêm mơno dêi thái cô, hok tro, nôu pâ hok tro. Rế hbrâ mơdât pơreăng COVID-19, rế hnê hriâm châ tơƀrê, rế tơniăn hiêm mơno ăm hok tro, nôu pâ, thái cô cho pơkâ xiâm má môi dêi mâu hngêi trung hriâm nôkố.

‘’Kơxô̆ F0 xuân ai tung hok tro ƀă thái cô xua mê tơdjâk troh tơdroăng hnê ƀă hriâm, mê ngin xuân hnê mơhno mâu hngêi trung tối tơbleăng kơxô̆ mơngế tro tâ, ki rơhêng vâ tối tung tung thái cô vâ tŏng kum teăm tơdrêng, kơvâ xuân séa ngăn tiô tơdroăng mơ-éa hnê mơhno mâu hngêi trung pêi pro tơtro tơdroăng tơniăn tung tơdroăng hnê hriâm, kêi đeăng hnoăng cheăng hơnăm 2021 – 2022’’.

VOV Tây Nguyên chêh

A Sa Ly tơplôu ƀă tơbleăng