Kong pơlê Gia Lai nôkố ai lối 9000 ngế ai hnoăng ƀă kăch măng dế châ tŏng kum. Pêi pro tơdroăng pâ mơnê mơngế ai hnoăng tơnêi têa, Vi ƀan kong pơlê Gia Lai mơ’no lối 1,5 rơtal liăn, tơkŭm po khu lăm pôu kơ-êng, tơpui tơno, diâp kơxuô tơmeăm ăm mâu rơpŏng ai hnoăng tơnêi têa. Tung mê, kăn ƀô̆ pêi cheăng kăch măng nah, mô đô̆i châi tamo, mâu ngế ai hnoăng ƀă kăch măng ƀă hía hé châ tơdah kơlo liăn kơnâ 300 rơpâu liăn.

Mâu Jâ Nôu Việt Nam Khên tơnôu, mô đô̆i châi tamo lối 81%, rơpŏng nhŏng o Mô đô̆i hlâ tung tơplâ xâ nah ai tơdroăng rêh ối pá puât châ tơdah kơxuô tơmeăm kơnâ 600 rơpâu liăn.

Xuân tung roh kố, khu râ kăn pơkuâ kong pơlê Gia Lai xuân tơkŭm po 19 khu râ kăn lăm pôu 10 Jâ Nôu Việt Nam khên tơnôu, rơtế ƀă mâu rơpŏng ai hnoăng tơnêi têa ki má môi ƀă kơxuô tơmeăm 2 rơtuh 500 rơpâu liăn. Kong pơlê xuân hiăng diâp lối 9.000 kơxuô tơmeăm dêi Kăn xiâm hnê ngăn tơnêi têa ăm mơngế ai hnoăng a kong pơlê Gia Lai.