Kơxo lơ 28/7, Khu ngăn hdroâng kuăn ngo kong pơlê Gia Lai tơkŭm po rôh hôp trâm mâ, khĕn kơdeăn mơngế ki châ vâi loi nhuô̆m kơhnâ rơkê tung hdroâng kuăn ngo a kong pơlê Gia Lai pơla hơnăm 2021 – 2023. Lâp kong pơlê Gia Lai nôkố ai 955 ngế krâ pơlê, ngế ki châ vâi loi nhuô̆m kơhnâ rơkê tung hdroâng kuăn ngo.

Mơdêk hnoăng cheăng, pôu râng hnoăng cheăng ƀă pơlê pơla, ngế ki châ kuăn pơlê loi nhuô̆m a Gia Lai hiăng mơdêk tro hnoăng cheăng dêi tơná tung mơhnhôk pơlê pơla pêi pro hnoăng cheăng mơnhông mơdêk cheăng kâ reh ối pơlê pơla tung rak vế gak kring tơniăn a cheăm tơring.

Ki nhên tung pơla hơnăm 2021 – 2023, mâu ngế ki châ vâi loi nhuô̆m kơhnâ rơkê a Gia Lai hiăng đi đo kơhnâ tơrŭm rơtế ƀă mâu khu râ a cheăm tơring hnê tối, mơhnhôk kuăn pơlê veăng kum ivá, tŏng kum kơhnâ tung tơdroăng tơ’noăng “Tâi tâng kuăn pơlê tơrŭm mơjiâng thôn pơlê nếo, kơphô̆ rơkê” ƀă lối 700 rơtal liăn, pleăng lối 132 rơpâu met karê tơnêi ƀă kum 47 rơpâu hâi pêi cheăng.

Pakĭng mê, ngế ki châ kuăn pơlê loi nhuô̆m kum lối 20 rơpâu rơpŏng kơtiê cho hdroâng kuăn ngo hơ’lêh túa tơmiât, túa pêi tung pêi chiâk deăng, mơ-eăm hluăn kơtiê. Kong pơlê Gia Lai rơhêng vâ tung la ngiâ ah, ngế ki châ kuăn pơlê loi nhuô̆m pơtối mơdêk tâ nếo hnoăng cheăng, tơdroăng loi tơngah dêi tơná, mơhnhôk hdroâng hdrê, pơlê pơla veăng mơnhông cheăng kâ rêh ối pơlê pơla, mơjiâng Đảng ƀă khu pơkuâ tơdroăng kal kí; rak vế gâk kring tơniăn, mơjiâng khu tơrŭm mâu hdroâng kuăn ngo.