VOV4.Xơ Đăng - Klêi kơ’nâi 2 măng tĭng ăm hok tro tâi tâng mâu râ hriâm tơdrêng a hngêi trung, kơvâ hnê hriâm ƀă hnê mơjiâng kong pơlê Gia Lai mơnhên lối 1.000 ngế hok tro ƀă thái cô tro tâ COVID-19. Drêng kố, mâu hngêi trung lâp kong pơlê nếo pơtối pêi pro kơtăng mâu pơkâ hbrâ, mơdât pơreăng rế pêi pro ƀeăn ƀĕng troăng hnê ƀă hriâm. Nôkố, mâu hngêi trung a kong pơlê pơtối pêi pro pơchân tối dêi kơvâ khăm pơlât ƀă hnê mơhno dêi Khu pơkuâ hnê hnê hriâm ƀă Hnê mơjiâng ‘na tơdroăng hbrâ, mơdât pơreăng tung hngêi trung hriâm.

Thái cô ƀă hok tro a pơlê kong kơdrâm Plei Ku khăm ngăn ki tô tung châ ahdrối roh hriâm

Mâu hngêi trung châ hlo F0 kô pêi pro tơdrêng tơdroăng klâ kơtăn khăm pơlât ƀă mâu ngế tro tâ pơreăng ƀă ăm mâu lâm ai F0 pơ’lêh hriâm tơdrêng tung um tiô troăng măng Internet tung pơla 1 măng tĭng. Tung la ngiâ, tiô hnê mơhno dêi Khu pơkuâ hnê hriâm ƀă Hnê mơjiâng tuăn ngôa rơkê, mâu hngêi trung pơtối pơtâng tối tơtro ƀă nôu pâ, hok tro vâ tơrŭm tơniăn hbrâ, mơdât pơreăng, rế rak tơdroăng hnê ƀă hriâm.

A Sa Ly tơplôu ƀă tơbleăng